خدیجہ بلوچ دو روچ پیش سی ٹی ڈی ءُ پاکستانی انٹیلی جنس ادارگاں دزگیر کتگ ءُ ناشناسیں جاھے ءَ برتگ۔
ھالانی رد ءَ شال ءَ بولان میڈیکل کالج ءِ میڈیکل ءِ نودربر خدیجہ بلوچ پاکستانی لشکر ءِ دست ءَ دزگیر کنگ ءُ ناشناسیں جاھے ءَ برگ ءِ ھلاپ ءَ گوستگیں سئے روچ ءَ نودربر بی ایم سی ءِ دیم ءَ زھرشانی نندانک داتگ۔
نودربر لوٹ اِنت کہ آھاں خدیجہ بلوچ ءُ آئی ءِ جان سلامتی ءِ بابت ءَ سرپدی دیگ بہ بیت ءُ نودربراں پاکستانی لشکر ءِ کالج ءِ ھاسٹل ءِ تہ ءَ ھوار بوھگ ءُ چھاپہ ایر جتگ۔
زانگ بہ بیت کہ خدیجہ بلوچ دو روچ پیش چہ وتی ھاسٹل ءَ دزگیر کنگ بوتگ ءُ ناشناسیں جاھے ءَ برگ بوتگ۔
نودربرانی زھرشانی ءَ پد سرکاری کارندھاں دزگیر کنگ ءِ پدر کتگ بلے سیاد ءُ وارسانی گْوشگ ءِ رد ءَ واکداراں انگت ءَ خدیجہ ءِ ھلاپ ءَ ھچ وڑیں ایف آئی آر ءُ کیس نبشتہ نہ کتگ۔
خدیجہ بلوچ ءِ مات ءُ پت ءَ گوستگیں روچ ءَ بی ایم سی ءِ زھرشانی ءِ بنجل ءَ چہ پریس کانفرنسے کنان ءَ گْوشتگ کہ ایشانی جنک زورانسری ءَ کارمرز کنان ءَ دروگیں بیان دیگ ءِ کوشست کنگ بیگ ءَ اِنت۔ خدیجہ ءِ بندیگ کنگ ءِ وھد ءَ اگاں چہ خدیجہ ءَ ھچ وڑیں بیان دیگ بہ بیت گڑا آئی ءِ ھچ وڑیں کانونی بستار نہ بیت۔
یات بہ بیت کہ بلوچستان سرکار ءِ یک انچیں پالیسی یے ھست کہ پاکستانی لشکر ءِ دست ءَ زورانسری ءَ بیگواہ کنگ بوتگیں جنین آدم دزگیر کنگ بہ بنت ءُ آھاں پریس کانفرنس ءِ زور ءَ گوں بلوچ سلاہ بندیں گلاں وتی سیادی ءِ درشان کنگ بہ بیت، ھمے وڑ تاں انوگ ءَ کراچی ءُ بلوچستان ءَ چہ بازیں جنین آدم دزگیر کنگ ءَ پد پیش کنگ بوتگ انت۔
دومی نیمگ ءَ برجاھیں دھرنا ءِ بابت ءَ بلوچ یکجھتی کمیٹی ءَ گْوشتگ کہ خدیجہ بلوچ ءِ یل کنگ ءِ واستا بی ایم سی ءِ دیم ءَ برجاھیں دھرنا مروچی وتی سیمی روچ ءَ سر بوتگ ءُ اے سئے روچانی تہ ءَ انتزامیہ ءِ نیمگ ءَ ھچ وڑیں دیمروئی نہ بوتگ ۔