بلوچستان ءِ دمگ سوراب ھشت اپریل 2026 ءَ بُنجاھی آر سی ڈی دگ سر ءَ پاکستانی پوج ءِ دست ءَ دو ورنا زورانسری بیگواہ کتگ اَنت، وھدے کہ چہ پنجگور ءَ سیادی داروکیں دو بیگواھیں مردم یل کنگ بیتگ اَنت-
گیشیں ھالانی رِد ءَ سوراب ءِ دمگ چہ ماراپ ءَ سیادی داروکیں بیست سالی ئیں نجیب اشرف ء محمد اشرف کہ ایف ایس سی ءِ نودربرے، ھشت اپریل 2026 ءِ نیمروچ ءِ کساس سے ءَ بُنجاھی آر سی ڈی دگ سر ءَ فرنٹیئر کور ( ایف سی) کارندھاں آوار جنگ ءَ پد بیگواہ کتگ-
ھمے روچ ءَ سوراب ءِ دمگ رودینی ( بُنکی ھنکین نصیر آباد) ءَ سیادی داروکیں سی سالی ئیں اللہ بخش ء عبدل کریم ھم ھمے ھند ءَ ھمے روچ ءَ ایف سی ءِ کارندھاں آوار جتگ ءُ بیگواہ کتگ –
دومی نیمگ ءَ پنجگور ءِ دمگ چہ گرمکان ءَ سیادی داروکیں دو مردم یل کنگ بیتگ اَنت-
یل کنگ بیتگیں مردمانی تہ ءَ اشفاق بلوچ ء اسداللہ ءُ دل جان بلوچ ء در محمد ھوار اَنت- دوئین پنچ جنوری 2026 ءَ چہ پنجگور ءَ آوار جتگ ءُ بیگواہ کتگ اَنت-
دمگی اِھوالکار ءِ رِد ءَ دوئیں مردم نُھ اپریل 2026 ءَ چہ چتکان پنجگور ءَ یل کنگ بیتگ اَنت-