بلوچ لبریشن آرمی ءَ گوستگیں ماہ ءَ زامران ءَ پاکستانی لشکر ءِ کیمپ ءِ سر ءَ اُرش کتگ ءُ پنچ کارمرد کشتگ اَنت۔
بلوچ لبریشن آرمی ءِ رد ءَ آئی ءِ سرمچاراں 29 مارچ ءَ کیچ ءِ دمگ زمران ءَ پاکستانی لشکر ءِ بنجل ءِ سر ءَ جتا جتائیں نیمگاں چہ اُرش کتگ کہ ایشی ءِ ویڈیو مرچی گل ءِ نیمگ ءَ شنگ کنگ بوتگ۔
بی ایل اے ءِ میڈیا چینل ھکل ءَ شنگ بوتگیں ویڈیو ءِ بندات ءَ یک کمانڈرے یک ماڈلے ءِ درچ ءَ اُرش ءِ شَور بندی ءِ بابت ءَ گپ جنگ ءَ انت ءُ سلاہ بندیں سرمچاراں جتا جتائیں نیمگاں چہ دیم ءَ روگ ءِ جنزگ ءِ سکین ءَ دیگ ءَ انت۔
بلوچ لبریشن آرمی ءِ میڈیا ونگ ءَ اے آپریشن ءِ نام ”زمران ءِ جنگ“ ایر کتگ ءُ اے اُرش ءِ فوٹیج ءَ گندگ بیت کہ سرمچار ڈرون ءِ کمک ءَ ایف سی کیمپ ءِ نگرانی ءُ ویڈیو ریکارڈ کنگ ءَ اَنت۔
زانگ بہ بیت کہ اے سال ءَ بی ایل اے ءَ ”قاضی ایرو ہائیو رینجرز“ ءِ نام ءَ یک برزی یونٹے ءِ جوڑ کنگ ءِ جار جتگ کہ گل ءَ وتی کاروائیانی دومی بھر ”آپریشن ھیروف“ ءِ بھر لیک اِتگ۔
گل ءِ جارکش جیئند بلوچ ءِ رد ءَ اے یونٹ ءَ بنداتی کارروائی سرجم کتگ ءُ ڈرون ٹیکنالوجی ءَ دور ءُ گچینی جاھاں نشانگ جوڑ کنگ ممکن کتگ۔ آئی ءَ گوشت کہ نوکیں جنگ نوں ایوک ءَ زمینی مھاز ءَ گوں بندوک نہ انت بلکینگ ءَ برزی ءُ ایندگر تَکانی تہ ءَ تالان بوتگ۔
بی ایل اے ءِ رِد ءَ زامران ءِ جنگ ءَ پاکستانی لشکر ءِ پنچ کارندہ مرتگ ءُ کیمپ سرجم ءَ تباہ بوتگ۔
گل ءَ اے ھم گْوشتگ کہ اے اُرش ءَ مئے سنگتاں چہ یکے عبدوست عزیز پنام ءِ ”المان“ شھید بوتگ۔