کسانیں دیدے گوں شھزادگاں
نبشتہ کار: زَرگان بلوچ
دی بلوچستان پوسٹ
مرچی وتی ھیالانی نبیسگ ءَ دست لزرگ ءُ چم پرگ جٓنگ ءُ دل دریک دریک ءِ توار کنگ ءَ اِنت۔ کسانیں ساھتُکے ءِ جیڑگ ءَ رند ھیال آتک بہ گند ئے تئی دست لرزگ ءُ چم پرگ ءُ دل لپرزگ ءَ انت کہ تو وتی لبزانی تہ ءَ انچیں کرداریں کسہ آرگ لوٹ ئے کہ تئی لبزانی کچ ءُ کساس کمتر انت چہ آھانی کردگار۔
من اے کدّی نہ جیڑ اِتگ اَت کہ منی گناھگاریں چم سیر دید بنت چہ شھزادگانی دیدار ءَ، من اے کدّی نہ جیڑ اتگ ات دل سیریں گپ ءُ ترانے نسیب بیت گوں شھزادگ ءَ، بلے منی نسیب ءَ باج بُرت۔ گوستگیں ماہ ءِ گڈی ئیں روچاں منی سپر بنا بوت انچیں جاھے من ءَ روگی ات کہ من اے کد ءَ نہ شُتگ آں، بس تھنا سنگت ءُ سیاد ءَ چہ اِشکتگ کہ لجے ءِ زیبائی گوں آئی ءِ دیوانگ ءَ بندوک انت۔
کساس ھشت ءُ دہ ساھت ءَ سپر کنگ ءَ رند ما لجے ءَ رست ایں، مئے سیاد ھست ات انت لجے ءَ گڑا ما ھمائی ءِ گس ءَ شُت ایں، بزگ ءَ مارا چاہ ءُ آپ کت، کمو دم ئِے بالا کشگ ءَ رند گس ءَ ڈن در کپت ایں۔ ڈن ءُ دراں پلیتیں پوجی نیست ات سرجمیں دمگ شھزادگ ءَ واھندی کتگ ءُ وھد وھد ءِ سر ءَ گشتی ٹولی کیت ڈنی مساپر ءُ لجے ءِ شھر ءِ نشتگیں مردمانی اڈ ءُ جنجالاں گوشدار ایت ءُ توجیل سازگ ءِ جھدے کنت۔
مئے کار ھم گوں شھزادگ ءَ بندوک ات، روڈ ءُ دگانی سر ءَ گشت کنگ ءِ نیمون ءَ در کپت ایں، گڑا اناگت ءَ چم کپت انت چار سائیکل یکجاہ اوشتاتگ دیوان ءَ یکے دومی ءَ، ھیر من تُرسان ءَ کمو نزیک بوتاں، دروت ءُ دراھبات بوت ایں گڑا سنگت ءَ منی دست چُک ات انت من آیانی دست چُک ات انت یک پہ یک ءَ، ھال ءُ اھوال بُوت۔ من جست کت کہ “سنگتاں مارا گوں بی ایل اے ( جیئند) کسانیں کارے ھست، اد ءَ اوشتوکیں سنگتانی سیادی گوں دو ادارہ ءَ بندوک ات بزانکہ بی ایل ایپ ءُ بی ایل اے جیئند، گڑا اوشتوکیں سنگتانی تہ ءَ کسے ءَ گشت “جی بہ گش چے پکار انت؟” ھیر من گشت”سنگت گوں کماندار ءَ بچکند ءَ کسانیں کارے کپتگ۔ ھال بہ کن ات بہ گش پلاں پلاں مردم اتکگ انت ءُ گوں تو گند ءُ نندے کنگ لوٹ انت۔” ھیر آئی ءَ گشت، “جوان انت گڑا بیگاه ءَ بیا ات ملکانی نیمگ ءَ بچکند کیت،” ھیر من گل ءَ بال بوتاں ءُ دوبر رواں بوت ایں پہ سیاد ءِ گِس ءِ نیمگ ءَ.
بیگاہ ءَ مُلکانی نیمگ ءَ شت ایں بلکیں بچکند ءِ سنگتے ڈیک بہ وارت۔ کساس چار ءِ وھد ات چم سائیکلے ءَ کپت کہ آ گشت کنگ ءَ انت، گڑا من دست دات آ منی کر ءَ اتک ءُ گشت ئِے” جی سنگت ” من گوں ژندیں گالوارے ءَ گوں دروگیں کندگے ءَ گشت”سنگت گوں بچکند ءَ ھال بہ کن بہ گش مساپرے آتکگ۔ گوں ترا گند ءُ نند کنگ لوٹ اِیت۔” آئی ءَ بچکند ءَ گوں سٹ ءِ سر ءَ ھال کرت گڑا بچکند ءَ گشت، “بہ زور ءُ کوٹی ءَ بیار اش۔” اے سنگت گشتی کمان ءِ زمہ وار ات اُمر ءَ کسان ات بلے آئی ءِ کماریں چمانی تہ ءَ آجوئی ءِ واب نکش ات۔
ھیر ما روان بوت ایں اُوتاک ءِ نیمگ ءَ، کساس دہ ادار ءِ سپر کرت ءُ بچکند ءِ جاہ ءَ سر بوتیں، کوٹی جھل ءَ ٹالی ءِ درچک ءِ ساھگ ءَ بچکند ودار ءَ ات۔ ھیر مارا آئی ءَ دروت ءُ دراہبات کے ءُ کوٹی نندارینت۔ بچکند یک وانندگ ءُ سرپدی ئیں مردمے ات۔ آئی ءَ وتی گریجویشن چہ لاھور ءَ سرجم کتگ ات ءُ پہ بلوچستان ءِ آجوئی ءَ در کپتگ ات، کول ء سنگت ئیگ ءَ مئے وَ نہ ٹَپّ اِیتگیں دپ ھمک جاہ ءَ نند انت وتی چاریں دانکاں پَرّیچ انت۔ ما بچکند ءَ گوں گپ ءُ تران کنگ ءَ اِتیں کہ دگہ سنگتے ءَ پہ ما سیاہ چاہ پِر کُرت ، ھیر تنی وھدی چاہ جوڑ بوت ءُ ما چاہ نوش کت بچکند دیوان ءَ ات ،بچکند ءِ گپانی تہ ءَ ریگولر پورس یا سنٹرلیز اسٹیکچرے ءَ گوں ھور بلوچ ءِ وشھالیں باندات ءِ دراھیں باوست تچک ءَ گندگ بوت انت۔
سیاست ءُ لبزانک ءَ گوں ھوار آئی ءِ الماس ءُ ادنان پکیر ءِ وڑیں سنگتانی کردار گوں وشمائیں لبزاں گیر آورت ءُ گشت جنگ وتی سرجمیں زلورتاں مدان مدان ءَ سرجم کنگ ءَ انت۔ بازیں گپ ءُ تران ءَ رند ما بچکند ھدا ءِ باھوٹ کت ءُ در کپت ایں۔چریشی ءَ رند بازیں جھدے کت بلے بچکند ءِ گندگ نسیب نہ بوت، بلوچ راج ءِ ھمک پُسگ منی چماں بچکند ءِ رنگ ءَ جنت۔
اے میان ءَ بازیں گپ ءُ رپے گوں لس مھلوک ءَ بوت، لس مھلوک چہ بلوچ آجوئی لوٹوکیں گل ءَ سک وش ءُ وشھال انت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-