بلوچستان لبریشن فرنٹ ءِ جارکش میجر گْوھرام بلوچ ءَ وتی درشان ءَ گوشتگ کہ بی ایل ایف ءِ سرمچاراں شش اپریل ءِ سھب ءِ ھپت ءَ یک مزنیں شوربندی یے ءِ رد ءَ زورگپتیں بلوچستان ءِ شال ءُ تپتان ءَ رؤکیں شھدگ چار جتاجتائیں جاھاں بستگ۔ اے آپریشن بی ایل ایف ءِ شوربندی ءِ بھرے اَت ایشی مول بلوچستان ءِ شھدگانی بند کنگ ءُ دژمن ءِ تر ءُ گرد ءِ دارگ ءُ بلوچستان ءِ چپ ءُ چاگرد ءِ دارگ اِنت۔ چہ ایشی ابید اے وڑیں کاروائیاں گل دژمن ءَ ھمے پیش دارگ لوٹ ایت کہ بلوچستان ءِ چونیں ھم ھندے سرمچارانی دست ءَ اِنت۔ پہ آپریشن ءِ سوبمندی ءَ سرمچار چار جتائیں ٹولیانی رنگ ءَ بھر کتگ اَنت۔ آ وتی نشانگیں جاھانی گرگ ءَ پوجی پودناکی شریں وڑے ءَ پیش داشتگ ءُ دژمن تاوان داتگ۔
آئی ءَ گوشتگ کہ سرمچارانی اولی ٹولی ءَ کردگاپ ءَ پولیس تھانہ ءِ سر ءَ اُرش کرتگ ءُ تھانہ دستیگ کتگ۔ تھانہ ءِ سرجمیں کارندہ دزگیر کتگ ءُ آیانی سلاہ پل اِتگ اَنت۔ بی ایل ایف ءَ وتی بلوچ راجی اکلاکی ءُ زرمبشت ءِ مول ءِ پژدر ءَ درسیں کارندہ انسانی ھمدردی ءِ بنیاد ءَ کڈن کرتگ ءُ یل داتگ اَنت۔ اے ٹولی ءَ کردگاپ دوراھی ءَ دگ بستگ۔
جارکش ءَ گوشتگ کہ سرمچارانی دومی ٹولی ءَ کلی شاھنواز ءَ شھدگ بستگ۔ اود ءَ آیاں گوں دژمن ءِ ٹوھیں کاروانے ءِ دیم پہ دیم بیتگ اَنت کہ آ کاروان ءَ پانزدہ ءَ گیش بکتربند گاڑی ھوار بیتگ اَنت۔ دژمن ءَ پہ دیم ءَ آیگ ءَ جھد کرتگ ءُ پہ دیم مارٹر آس داتگ۔ بلے سرمچاراں چہ مھکمیں سنگراں دژمن ءِ کاروان ءِ سر ءَ ترندیں اُرشے کرتگ۔ چریشی ءِ آسر ءَ دژمن ءِ کاروان پُشتکنز بیتگ ءُ چہ دور ءَ گولا آس داتگ ءُ شتگ۔
جارکش ءَ گوشتگ کہ سرمچارانی سیمی ءُ چارمی ٹولیاں شال ءِ نزیک ءَ پنجپائی ءِ دو گچین ءِ ھنداں سنگر گپتگ۔ اے ٹولیاں چہ شال ءِ نیمگ ءَ آؤکیں کجام ھما پوجی کمک ءِ دارگ ءَ جوانیں کرد پیلو کرتگ۔ آیاں بازیں اداراں دژمن ءِ زمینی کمک داشتگ۔
جارکش ءَ گوشتگ کہ دگ بندی ءِ وھد ءَ کردگاپ ءَ سادہ پوشاکیں پاکستانی پوج ءِ ایس ایس جی کمانڈو ءُ آدگہ کارندہ سول گاڑیاں سوار بیتگ اَنت ءُ دگ بندی ءِ پروشگ ءِ جھد اِش کرتگ۔ سرمچاراں پہ وھد کاروائی کرتگ ءُ آ نشانگ کرتگ اَنت۔ یک گاڑی یے سرجم ءَ اُرش ءِ نشانگ ءَ آتکگ۔ گاڑی ءَ سواریں پنچ کارندہ ایس ایس جی کمانڈو بنیامین، نائیک فرزند علی، سپاھی بابر علی ءُ سپاھی ابوبکر جاہ پہ جاھی مرتگ اَنت۔ آدگہ دوئیں گاڑی چہ جنگ جاہ ءَ تتکگ اَنت۔
جارکش ءَ گوشتگ کہ سھب ءِ دہ ءِ نزیک ءَ چہ نوشکی ءِ نیمگ ءَ آؤکیں بیست ءَ گیش گاڑیانی کاروانے ءَ کردگاپ کراس ءَ سرمچارانی انگیر ءِ پروشگ ءِ جھد کرتگ کہ اود ءَ یک ترندیں میڑے بندات بیتگ۔ سرمچاراں گوں راکٹ لانچر، گرنیڈ لانچر ءُ وتکاریں سلاھاں دژمن ءِ سَے گاڑی سرجم ءَ تباہ کتگ اَنت۔ گاڑیاں سواریں باز کارندہ مرتگ۔ چہ آیاں یکے ءِ نام محمد مزمل اِنت۔ دژمن ءِ کاروان چہ ترس ءَ وتی ٹپی این ءُ لاش اُرش جاہ ءَ یل داتگ اَنت ءُ تتکگ۔
جارکش ءَ گوشتگ ھمے میان ءَ ڈرون، ھیلی کاپٹر ءُ کواڈ کاپٹرانی تر ءُ گرد برجاہ بوتگ۔ بلے سرمچارانی ترندیں گھگیری ءِ پژدر ءَ دژمن پدکنز اِتگ۔ ھمے وھد ءَ سرمچاراں دژمن ءِ بُرز بالیں سَے کواڈ کاپٹر ھم نشانگ کتگ اَنت ءُ تباہ کرتگ اَنت۔ سرمچاراں وتی شوربندی ءِ رد ءَ نیمروچ ءَ دگ بندی ھلاس کرتگ۔ بلے دژمن ءِ ودار ءَ داں شپ ءَ شھدگ ءِ نزیکیں جتاجتائیں ھنداں سنگر داشتگ اَنت۔
جارکش ءَ گوشتگ کہ اے کاروائی ءِ وھد ءَ بی ایل ایف ءِ یک دلیریں سرمچارے اخلاق احمد مینگل پنام نزیر ھزدار ءِ ھند وڈ ءِ جھمنند اِنت گوں دژمن ءَ دیم پی دیمی میڑ ءَ دلیری ءَ جنگ داتگ ءَ نمیران بیتگ۔نمیرانیں اخلاق احمد نہ تھنا یک شریں چیرجنگی کمانڈرے بیتگ بلکیں یک آشوبی شائرے ھم بیتگ۔ آئی ءَ وڈہ، بولان، مستونگ ءُ کلات ءِ سنگراں زرمبشت مھکم کرتگ ءُ کلات ءِ ھند مھلبی ءَ بنجل ءِ کمانڈرے ءِ بستار ءَ وتی کرد پیلو کرتگ۔ شھیدی ءِ وھد ءَ آ کردگاپ ءُ گرگینہ ءَ یک تر ءُ گردی ٹولی یے ءِ سروکی ءَ کنگ ءَ بیتگ۔ بی ایل ایف اے گرانبھائیں راجی پسگ ءِ دیمونی ءَ ستک شانی ندر کنت۔
جارکش ءَ گوشتگ کہ بلوچستان لبریشن فرنٹ اے گپ ءَ تچک ءَ گوش ایت کہ کردگاپ آپریشن پہ زورگپتیں بلوچستان ءِ آجوئی ءَ برجاھیں دراجیں جنگ ءَ مئے راجی ارادہ ءُ جھد ءِ بھر اِنت۔ بی ایل ایف ءَ ھمک جاہ ءَ دژمن ءَ را پیش داشتگ کہ گل کجام جاہ ءُ وھد ءَ بہ لوٹ ایت زورگریں ریاست ءَ پروش دات کنت ءُ سرجمیں نزام ءَ تاوان دنت۔ اے کاروائی داں ھما وھد ءَ برجاہ بنت دانکہ زورگریں پوج ءِ گڈی سپاھی چہ مئے سرزمین ءَ در نہ کپ ایت۔ مئے جنگ آجو ءُ وتواجھیں بلوچستان ءِ جوڑ بیگ ءَ ھمک سنگر ءَ گوں ترندی ءَ برجاہ بیت۔