ماں میان اُستمان ءَ انسانی ھکانی کونسل ءَ ڈاکٹر صبیحہ بلوچ ءَ بلوچستان ءِ جاورھالانی سر ءَ لیکہ درشان کتگ انت

بلوچ یکجھتی کمیٹی ءِ بنجاھی رھشون ڈاکٹر صبیحہ بلوچ ءَ میان اُستمان ءِ انسانی ھکانی کونسل ءِ 61می دیوان ءَ تران کنان ءَ بلوچستان ءَ کہ اود ءَ مزنیں کچے ءَ درملکی منسوبہ دیم ءَ روگ ءَ انت انسانی ھکانی مزنیں لگتمالی ءِ آماچ انت۔

آئی ءَ وتی کلوہ ءِ تہ ءَ زورانسری بیگواھی ءِ جیڑہ ءَ را دیم ءَ آؤرتگ ءُ گْوشتگ کہ بلوچ مھلوک ءِ زورانسری بیگواھی برجاہ اِنت۔ آئی ءِ گشگ ءِ رد ءَ درکانودی کوش ءُ ٹپ ءُ ٹوریں لاشانی دزکپگ یکشل ءَ برجاہ انت کہ آئی ءَ گوشتگ اے پہ زانتی دروشمئے ءَ کنگ بوگ ءَ انت۔

ڈاکٹر صبیحہ بلوچ ءَ گشتگ کہ اھوالکار، نودربر، وکیل ءُ انسانی ھکانی باسکاں وتی ھیالانی درشان کنگ ءِ ھاتر ءَ انسداد ناشرکاری ءِ کانود ءِ چیر دستی ءَ تنگ کنگ، دزگیر کنگ ءُ کیس ءِ آماچی بوگ ءَ انت۔

آئی ءَ دیمترا گْوشتگ کہ ڈاکٹر مھرنگ بلوچ ءَ ھوار بلوچ یکجھتی کمیٹی ءِ بازیں راھشون دیر اِنت کہ بندی جاہ ءَ بند اَنت۔

گُڈسرا آئی ءَ چہ میان استمان ءَ لوٹ کرتگ کہ آ بلوچستان ءَ انسانی ھکانی جاورھالانی سر ءَ وتی لیکہ ءُ وتی نیمگ ءَ چار ءُ تپاسی یے بہ کنت۔
–