بلوچ یکجھتی کمیٹی ءِ رھشون ءَ “ دی گارڈین” ءَ چھاپ بوتگیں یک نبشتھے ءَ وتی بندیگی ، گھگیری ءُ بلوچ راج ءِ جد ءُ جھد ءِ سر ءَ چمشانک داتگ۔
شال ءِ سینٹرل جیل ھُدا ءِ بلاک نُھ ءَ یک سالے زندان ءَ سرجم کنوکیں ڈاکٹر ماھرنگ بلوچ ءَ وتی نبشتانک ءِ تہ ءَ گْوشتگ کہ اے بندیگ کنگ آئی ءِ سیاسی جھد ءِ دیم ءَ دارگ ءَ بے سوب بیتگ۔ “منی پرایمنیں جھد برجاہ اِنت”
بلوچ یکجھتی کمیٹی ءِ سروک ڈاکٹر ماھرنگ بلوچ ءَ وتی نبشتانک ءِ تہ ءَ گْوشتگ کہ من ءُ آئی ءِ دوئیں ھمکار دگہ جنین بندیگاں جتا دارگ بوتگ اَنت، بس ھمے ھاتر ءَ کہ آ سیاسی بندیگ اَنت۔ آئی ءِ گشگ اِنت کہ تنھاھی ءِ درد چہ جسمانی ازیت ءَ باز گیشتر اِنت، ھاس وھدے کہ آئی ءِ ھاندان آئی ءِ کارانی سبب ءَ نشانگ جوڑ کنگ بوھگ ءَ اِنت۔
نبشتانک ءَ پدر بوتگ کہ آئی ءِ ناکوزتک سلال بلوچ ءُ سیف اللہ بلوچ زورانسری بیگواہ کنگ بوتگ اَنت ءُ آئی ءِ برات ”فورتھ شیڈول“ ءَ ھوار کنگ بوتگ ءُ آئی ءِ سر ءَ ترندیں چار ءُ تپاسی، سپری بندش ءُ مالی جیڑھانی آماچ اِنت۔ آئی ءِ گوھار ھم پریس کانپرنساں وتی توار ءِ چست کنگ ءِ کیسانی دیم ءَ پریشانی کنگ کپتگ۔
ڈاکٹر ماھرنگ ءَ گْوشتگ کہ زندان ءَ پون کنگ ءِ سر ءَ پابندی اِنت ءُ زندان ءِ تہ ءَ ایوک ءَ شمبے ءِ روچ ءَ کیس گوشدارگ بنت دانکہ لس مھلوک ءِ رسگ ءِ راہ ءَ بند بہ بہ اَنت۔ آ نبشتہ کنت کہ آئی ءِ دزگیر ءُ بندیگ کنگ اال ءَ بلوچ راج ءِ ھک ءِ لوٹگ ءِ سزا ءَ اِنت ءُ اے گپ ایشانی جزم ءَ گیشتر مھکم کنت۔
آئی ءَ ریاستی زوراکءُ، زورانسری ءَ بیگواہ کنگ ءُ بلوچ زالبولانی نشانگ جوڑ کنگ ءِ وڑیں وئیلانی سر ءَ چمشانک دات ءُ گْوشتگ کہ 2025 ءَ بی وائی سی ءَ 1200 ءَ چہ گیش زورانسری ءَ بیگواہ کنگ ءِ اھوال دیم ءَ آورتگ انت۔ آئی ءِ گشگ اِنت کہ پرایمنیں گھگیری ءِ ھترہ لیکگ جمھوری شرپ ءِ انکاری اِنت۔
ڈاکٹر ماھرنگ بلوچ ءَ اے گپ پدر کت کہ بی وائی سی پاکستان ءِ آئین ءِ دائرہ ءِ تہ ءَ انسانی ھکانی لگتمالی ءِ ھلاپ ءَ ایمنی ءِ جھد ءَ کنت۔ آئی ءَ درستیں زوراکیانی ایرجنی کتگ ءُ گشتگ کہ ریاستی پندل ایشانی تھریک ءَ گوں سلاہ بندیں گلاں ھمگرنچ کنگ ءِ جھد ءَ انت۔
نبشتانک ءِ گُڈسر ءَ نبشتہ کنت کہ ” یات زندان ءَ تیز بنت بلے ایشانی تہ ءَ زندگ تریں یات منی وتن بلوچستان اِنت ما وتی ایمنیں گھگیری ءَ برجاہ داریں“۔