بنوں ءَ تھانہ ءِ سر ءَ جنگولانی اُرش ءَ 5 مردم بیران ءُ 13 ٹپیگ بیتگ اَنت

پاکستان ءِ استان خیبر پختونخوا ءِ دمگ بنو ءَ پولیس اسٹیشن ءِ سر ءَ سلاہ بندیں مردمانی اُرش ءَ 5 مردم بیران ءُ 13 ٹپیگ بوتگ انت۔

دمگی پولیس ءَ اے وئیل ءِ ھال راست کتگ ءُ دمگی مردمانی گشگ ءِ رد ءَ ناشناسیں مردماں ڈومیل پولیس اسٹیشن ءِ دیوال ءَ تراکناکیں شورواں پُریں گاڑی ءَ گوں ٹکر جتگ ءُ چہ ایشی ءَ چہ تراکے ءِ توار بوتگ۔ تراک ءِ آسر ءَ تھانہ ءِ دپ ءِ چیک پوسٹ ءُ تھانہ ءِ مزنیں بھرے تباہ بوتگ۔

بنو پولیس ءِ نیمگ ءَ چہ شنگ بوتگیں پریس ریلیز ءَ گْوشگ بیتگ کہ ’ڈومیل پولیس اسٹیشن ءِ سیمسر ءِ تہ ءَ پولیس اسٹیشن ءِ نزیک ءَ ناشرکارانی نیمگ ءَ وت کُشی اُرشے ءِ کوشست کنگ بوتگ کہ وھد ءِ سر ءَ سیکورٹی گامگیجانی سبب ءَ ناکام کنگ بوتگ۔‘

پولیس ءَ گْوشتگ کہ ‘بُنکی ھالانی رد ءَ وت کُشیں بمبتراک کنوک ءَ ڈومیل پولیس اسٹیشن ءَ نشانگ جوڑ کنگ لوٹ اِتگ، بلے وتی نا شریں ارادہ ءَ ناکام بوتگ ءُ پولیس اسٹیشن ءِ دپ ءَ نزیکیں شھری آبادی ءَ نشانگ جوڑ کتگ ءُ ایشی ءِ آسر ءَ پنچ بے گناہیں شھری بیران بوتگ اَنت۔’

پولیس ءِ رد ءَ بیران بوتگیں مردمانی تہ ءَ سئے جنین، یک مردے ءُ یک زھگے ھوار اِنت ءُ 13 مردم سک ٹپیگ بوتگ اَنت۔

بیان ءِ تہ ءَ گْوشگ بیتگ کہ ’’وئیل ءَ چہ پد پولیس، بمب ءِ اسکواڈ یونٹ ءُ دگہ کانود ءِ سازگارانی ادارگ جاہ ءَ سر بوتگ اَنت ءُ دمگ ءَ را انگیر کتگ ءُ پٹ ءُ پول ءِ کار بندات کتگ۔‘‘

وئیل ءِ نوٹس ءَ چہ ڈی پی او بنو یاسر آفریدی ءَ جاہ ءِ تر ءُ تاب کتگ ءُ ٹپیانی چار ءُ تپاسی ءِ واستا نادراھجاہ ءَ ھم شتگ۔ آئی ءَ سیادی داروکیں افسراناں کڈنی کتگ کہ آ ٹپیگاں جوانیں دوا ءُ درمان ءِ آسراتی پجاری بہ کن اَنت ءُ وئیل ءِ سرجمیں پٹ ءُ پول ءَ بہ کن اَنت ءُ وئیل ءَ ھواریں مردم گرگ ءُ دیم ءَ آرگ بہ بنت ۔