بلوچستان لبریشن فرنٹ ءِ جارکش میجر گوھرام بلوچ ءَ بی ایل ایف ءِ مارچ ءِ کاروائیانی رپورٹ شنگ کتگ ءُ گوشتگ کہ سرمچاراں مارچ ءِ ماہ ءَ زورگریں پاکستانی پوج ءُ آئی ءِ جھلی ادارہ ءُ مالی شوربندیانی سر ءَ اُرشانی تہ ءَ گیشی آورتگ ءُ 39 کاروائی کتگ انت۔ اے میان ءَ دژمن ءَ بازیں کچے ءَ جانی ءُ مالی تاوان داتگ۔ اے کاروائی پنجگور، پسنی، کوھلو، تربت، ھوشاب، ھزدار، بیسیمہ، ھب، جاؤ، ھیرونک، تمپ، نال، گوادر، تجابان، چاگی، واشک، مند، مستونگ، بارکھان، کلات، شاھرک، مالار ءُ گیشکور ءَ ھوار دگہ 23 ھنداں کنگ بوتگ اَنت۔ ایشی ءِ آسر ءَ کم چہ کم 30 کارندہ مرتگ انت ءُ ھپت سکا ٹپی بوتگ انت۔
آئی ءَ گوشتگ کہ بی ایل ایف ءِ سرمچاراں مارچ ءِ ماہ ءَ درساں مزنیں کاروائی تمپ ءِ ھند اپسی کھن ءَ کتگ۔ اود ءَ سرمچاراں شوربندی ءِ رد ءَ دژمن ءِ چوکیانی سر ءَ ترندیں اُرش کتگ ءُ ڈرون تباہ کتگ۔ اے آپریشن ءِ وھد ءَ زورگریں پوج ءِ پانزدہ کارندہ کشتگ انت، اے آپریشن ھمے راستی ءَ پیش دار ایت کہ سرمچارانی سوبمندی پوجی ھنر ءِ سوب ءَ دژمن ترس آماچ اِنت۔
آئی ءَ گوشتگ کہ چیریں بھرگ ءَ سَے آپریشن ءِ وھد ءَ دژمن ءِ دوازدہ نزیکیں کارندہ ءُ چریک کشتگ انت۔ اے نیٹورک بلوچ ورنایانی زوریں بیگواھی ءُ سرمچارانی چاریگی ءَ تچک ءَ ھوار اَنت۔ ھمے وڑ ءَ سرمچاراں دژمن ءِ چاریگی نشانگ کتگ ءُ سَے ڈرون ءُ دو کیمرہ تباہ کتگ انت۔ یک دگہ کاروائی یے ءَ دژمن ءِ انٹیلیجنس کارگس نشانگ کتگ ءُ تاوان داتگ۔
جارکش ءَ گوشتگ کہ پوج ءِ پانزدہ چوکی ءُ پنچ مزنیں بنجلانی سر ءَ اُرش کتگ۔ دژمن ءِ راشنانی تاوان دیگ ءَ پنچ جاہ ءَ دگ بندی کتگ۔ زورگپتیں بلوچستان ءِ مڈیانی لٹ ءُ پل ءَ ھواریں یک کمپنی یے نشانگ کتگ۔ اُرشانی وھد ءَ دژمن ءِ شش گاڑی تباہ کتگ انت ءُ مادن بروکیں دو گاڑی نشانگ کتگ انت۔
آئی ءَ گوشتگ کہ اے ماہ ءِ کاروائیاں نوکین ءُ ٹوھیں سلاہ کارمرز کنگ بوتگ۔ کم چہ کم یازدہ اُرش ٹوھیں سلاھانی گون ءَ کنگ بوتگ اَنت۔ پنچ گرنیڈ لانچر ءِ اُرش، دو دستی بمب ءُ دو چیر کتگیں شورھانی تراک کتگ انت۔ دو سنائپر اُرشاں دژمن نشانگ کتگ، گوں دژمن ءَ دو جاہ ءَ دیم پہ دیمی میڑ بوتگ ءُ پوج ءِ یک کاروانے ھم اُرش ءَ نشانگ کتگ۔ اے کاروائیانی وھد ءَ سرمچاراں دژمن ءِ سلاہ ھم دستیگ کتگ اَنت۔
جارکش ءَ گوشتگ کہ پہ وتن ءِ رکینگ ءَ اے جنگ ءَ بی ایل ایف ءِ نھ سرمچاراں گوں دلیری ءَ جنگ داتگ ءُ شھید بیتگ اَنت۔ اے شھیداں دژمن ءَ را پیش داشتگ کہ پوجی زور ءَ بلوچ راج ءِ آجوئی جزبگ نزور کنگ نہ بیت۔ بی ایل ایف اے راجی شھیداں آیانی بے مٹیں دیمونیانی سر ءَ ستک شانی ندر کنت ءُ آیانی جھد ءَ منزل ءَ سر کنگ ءِ کول ءَ کنت۔ھ