بلوچستان ءِ دمگ پنجگور ءَ بلوچ آجوئی لوٹوکاں ’’ڈیتھ اسکواڈ‘‘ ءِ بازیں بنجلانی سر ءَ ھمگرنچیں اُرشانی نشانگ جوڑ کتگ انت ءُ گچنی جاھاں ناکہ بندی کتگ دمگ وتی کنٹرول ءَ کتگ انت ءُُ فوجی کارواناں اُرشانی دیمپانی کنگ کپتگ۔
گوستگیں شپ ءَ پنجگور ءِ جتا جتائیں دمگ خدا آبادان، گرمکان، چتکان، ٹی ایس پی، فٹبال چوک، پسکول ءَ ھوار جتا جتائیں جاھاں بازیں کلاکاں یکیں وھد ءَ اُرش کنگ ءَ پد مزنیں کساسے ءَ سلاہ بندیں مردماں کنٹرول کتگ۔
اے اُرشانی تہ ءَ سرکار ءِ کمک ءَ سلاہ بندیں گلانی پناہ گاہ کہ ’ ڈیتھ ءِ اسکواڈ‘‘ ءِ نام ءَ زانگ بنت، نشانگ جوڑ کنگ بوتگ اَنت۔
دمگی مردمانی رد ءَ ڈیتھ اسکواڈانی سروکی ءَ بھرام، شاہدوک، کلیم اللہ، فرحان، سعود ءُ شاہزیب ءِ پناہ گاہانی سر ءَ جتا جتائیں جاھاں اُرش کنگ بوتگ۔ اُرش کلانی کلاک برجاہ بوتگ اَنت، آجوئی لوٹوکیں مردماں بازیں پناہ گاھانی سر ءَ سرجمیں کنٹرول ءِ گرگ ءَ سوبین بوتگ اَنت۔
پاکستانی لشکر ءَ فٹبال چوک ءُ پسکول کور ءَ جانی تاوان رس اتگ کہ اود ءَ سلاہ بندیں مردماں کہ پیسر ءَ سنگر گپتگ ءُ لشکر ءِ کارواناں نشانگ جوڑ کتگ انت۔
واکداراں اے درگت ءَ انگت ءَ ھچ وڑیں ھال ءُ اھوال نہ داتگ۔ دمگ ءَ انٹرنیٹ بند بوھگ ءُ مرچی سھب ءَ لشکر ءِ انگیر ءُ چھاپہ ءِ سبب ءَ مردم وتی لوگاں بند بوتگ اَنت۔
زانگ بہ بیت کہ اے سلاھبند کہ ”ڈیتھ اسکواڈ“ ءِ نام ءَ زانگ بنت، بلوچستان ءِ جتاجتائیں دمگاں ناشرکاری ءَ پرکاری ءَ گندگ بنت۔ دمگی مردمانی گشگ ءِ رد ءَ اے سرکاری کمک ءَ چہ دیم ءَ آؤرتگیں ڈیتھ اسکواڈ ٹارگٹ کلنگاں ھوار اَنت کہ ایشی ءِ تہ ءَ لس مردمانی ھاسیں رنگ ءَ سیاسی ءُ چاگردی کارکنانی سر ءَ زورانسری ءَ بیگواہ کنگ ءُ آیانی لاشانی چگل دیگ ھوار اَنت۔
بلوچستان ءِ سیاسی، چاگردی ءُ انسانی ھکانی گلانی گْوشگ انت کہ اے گل ریاستی ادارھانی سرپرستی ءَ پرکار اَنت کہ آیاں جرم ءِ بدل ءَ منشیات ءِ سوداگری ءُ دگہ چاگردی بدکاریانی تہ ءَ ھوار بوھگ ءِ اجازت دیگ بوتگ انت۔
گْوستگیں روچاں پنجگور ءَ چشیں بیست ءَ گیش وئیل دیم ءَ اتکگ کہ اود ءَ ورنا آوار جنگ ءُ کُشگ بیتگ اَنت۔ اے وئیلانی تہ ءَ ھم ھمے سلاہ بندیں گل گْوشگ بیگ ءَ اَنت۔
گوستگیں شپ ءَ پنجگور ءَ بوتگیں اُرشانی زمہ واری انگت ءَ ھچ گل ءَ نہ زرتگ انت۔