بلوچستان ءَ جتاجتائیں دمگاں بیتگیں اُرشانی زمہ واری بی ایل ایف ءُ بی آر جی ءَ منّ اِتگ اَنت

بلوچستان ءِ جتاجتائیں دمگاں پاکستانی پوج ءُ ریل سر بیتگیں اُرشانی زمہ واری بی ایل ایف ءُ بی آر جی ءَ منّ اِتگ اَنت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ مئے سرمچاراں شانزدہ مارچ 2026 ءَ مند ءِ دمگ ردیگ ءَ پاکستانی پوج ءِ چوکی ءِ سر ءَ گرنیڈ لانچر ءَ چہ گولہ آس داتگ، کہ وتی نشانگ ءَ کپتگ اَنت- اُرش ءِ آسر ءَ زورگریں پاکستانی پوج ءَ جانی تاوان چست کنگ کپتگ- اے روچ ءَ دگہ یک کاروائی ءَ بی ایل ایف ءِ سرمچاراں مند ءِ دمگ سورو ءَ ھم پاکستانی پوج ءِ چوکی ءِ سر ءَ گرنیڈ لانچر ءِ گولہ آس داتگ چریشی ءِ آسر ءَ زورگریں پوج ءَ جانی ءُ مزنیں کچے ءَ تاوان رس اِتگ-

جارکش ءَ گْوشتگ کہ شانزدہ مارچ ءَ دگہ یک کاروائی ءَ سرمچاراں کیچ ءِ دمگ ھیرونک ءَ سی پیک دگ سر ءَ برجاہ پاکستانی پوج ءِ یک چوکی یے سر ءَ اُرش کتگ مزنیں ءُ وتکاریں سلاھاں چہ نشانگ کتگ- اُرش ءِ آسر ءَ پاکستانی پوج ءَ جانی ءُ مالی تاوان چست کنگ کپتگ-

گُڈی ءَ جارکش ءَ گوشتگ مند ءُ ھیرونک ءَ بیتگیں اُرشانی زمہ واری ءَ منّ ایں-

ھمے وڑ بلوچ ریپبلکن گارڈز ءِ جارکش دوستین بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں ھپدہ مارچ ءِ شپ ءَ شکارپور ءِ ھند سر ءَ ائید اسپیشل ریل (جعفر ایکسپریس) آئی ای ڈی بمب ءَ چہ نشانگ کتگ، چریشی ءِ آسر ءَ ریل ءُ ریل ٹریک ءَ سک تاوان رس اِتگ-

جارکش ءَ گوشتگ کہ ھپدہ مارچ ءَ دگہ یک کاروائی ءَ سبی ءِ نزیک ءَ تلی دگ سر ءَ پولیس چیک پوسٹ سر ءَ سرمچاراں دارگ ءِ جُھد کتگ چریشی ءُ چیک پوسٹ ءَ ساڑی کارمند ءُ سرکاری گاڑی نشانگ کتگ اَنت-

جارکش ءَ گوشتگ بلوچ ریپبلکن گارڈز شکارپور ءَ جعفر ایکسپریس ریل ءُ سبی پولیس ءَ سر ءَ بیتگیں اُرشانی زمہ داریاں منّ اِیت رسانکدر ءَ چہ پولیس کارندہ کڈن کتگ اَنت کہ آ بلوچ سرمچارانی ھلاپ ءَ کجام ھما کاروائی ءَ چہ پھریز بکن اَنت، اگاں ناں آ وتی جانی تاوان ءِ زمہ وار وت بنت-