نوکیں سلاہ ءُ کمیرھاں گوں بندوکیں بلوچ آجوئی لوٹوکیں بی ایل اے ءَ جیونی ءَ اُرش ءِ تامر شنگ کتگ

بلوچ لبریشن آرمی ( بی ایل اے) ءَ جیونی ءَ پاکستانی فورسز ءِ کوسٹ گارڈ ءِ چوکی ءِ سر ءَ انوگیں اُرش ءِ ویڈیو شنگ کتگ کہ ایشی ءِ کساس یک منٹ ءُ 53 سیکنڈ اِنت۔

ویڈیو ءِ تہ ءَ گندگ بیت بلوچ لبریشن آرمی نوکیں ایکشن کیمرہ ءُ سلاھاں گوں سلاہ بندیں نیمگ ءَ اناگت ءَ کارندھانی سر ءَ اُرش کن انت ۔

ویڈیو ءِ تہ ءَ گندگ بیت کہ موٹر سائیکل ءِ سر ءَ اُرش کنوک زوت پوسٹ ءِ نزیک ءَ سر بنت ءُ اود ءَ ھستیں کارندھانی سر ءَ تیرگواری کن اَنت۔

ندارگانی رد ءَ دو کارندہ جاہ ءَ نشانگ جوڑ کنگ بنت ءُ یک کارندھے اُرش ءِ بنداتی ساھتاں وتی جان ءِ رکّینگ ءِ جھد ءَ کنت بلے دگہ اُرش کنوکے آئی ءَ نشانگ جوڑ کن انت۔

ویڈیو ءِ گڈی بھر ءَ ارش کنوکاں چہ دست کپتگیں سلاہ ھم گندگ بنت۔

بلوچ لبریشن آرمی ءِ جارکش جیئند بلوچ ءَ وتی یک بیانے ءِ تہ ءَ گْوشتگ کہ آپریشن بی ایل اے ءِ شھری گوریلا یونٹ ءِ نیمگ ءَ کنگ بوتگ۔