پنجگور ءَ لاشے دزکپتگ، کیچ ءَ تیرگواری ءَ یک مردمے بیران

بلوچستان ءِ دمگ پنجگور ءُ تربت ءَ تیرگواری ءَ یک مردمے بیران ءُ یک لاشے دزکپتگ-

گیشین اھوالانی رد ءَ پنجگور ءِ دمگ شاپتان ءَ یک مردمے ءِ لاش دزکپتگ-

دزکپتگیں لاش ءِ پجار محبوب ء امان اللہ جھمنند گوارگو ءِ نام ءَ زانگ بیتگ-

اھولانی رد ءَ محبوب ھشت ماہ پیش چہ گوارگو ءَ آوار جنگ بیتگ ءُ مروچی آئی ءِ لاش شاپتان ءَ دزکپتگ-

ھمے وڑ تربت بیرونک ءَ ناشناسیں سلاہ بندیں مردمانی تیرگواری ءَ یک مردمے بیران –

بیران بیتگیں مردم ءِ پجار آصف ء نزیر احمد جھمنند کرکی سنگ آباد ءِ نام ءَ زانگ بیتگ کہ آ زمباد گاڑی ءِ ڈرائیور گوشگ بوگ ءَ انت-

وئیل ءَ پد اُرشکار تچگ ءَ سوبمند بوتگ انت ءُ وئیل ءِ سبب زانگ نہ بیتگ- پولیس گیشیں پٹ ءُ پول کنگ ءَ انت-

ھمے وڑ ءَ بلوچ یکجھتی کمیٹی ءَ پنجگور ءَ وکیل حمل حسنی ھوار چار بلوچ ورنایانی کوش ءَ تُرندی ءَ ایر جن ایں، میان استمانی گل زوت گامگیج بہ زور انت-

بی وائی سی ءِ نیمگ ءَ چہ شنگ بوتگیں درشان ءِ رد ءَ 6 مارچ 2026 ءَ پنجگور ءِ کوہ سبز ءِ دمگ ءَ پاکستانی لشکر ءِ کارندھانی دست ءَ حمل حسنی ء صمد حسنی کشتگ ءُ کہ آ وکیلے بوتگ ءُ بے سلاہ بوتگ۔ بیان ءِ تہ ءَ گْوشگ بیتگ کہ استیں جاور ھال ءَ بلوچستان ءَ ورنائیں بلوچ بوھگ برے برے مرگ ءِ سزا جوڑ بیت-

بیان ءِ تہ ءَ گیش گْوشگ بیتگ کہ ھمل حسنی ءِ کُشگ ھما کار ءِ برجاہ دارگ اِنت کہ انسانی ھکانی جھدکار گوستگیں دو دھکاں چہ پدر کنگ ءَ اَنت۔ اے رھبند ءِ چیر ءَ بلوچ شھری چہ وتی گس، چیک پوسٹ یا دگہ جاھاں بندیگ کنگ بنت ءُ دوریں دمگاں دیم دیگ بنت ءُ پد ءَ آیانی جون وتی کھول ءِ دست ءَ دیگ بنت۔ گیشتریں واکدار آیاں گمانی رنگ ءَ دیم پہ دیمی جنگ ءَ بیرانی لیک اَنت یا دگہ وڑیں کجام راستی دیگ ءَ انکاری انت۔

بیان ءِ تہ ءَ گْوشگ بیتگ کہ پنجگور ءِ دگ ترس ءِ چیدگ جوڑ بوتگ اَنت کہ اود ءَ نودربر، استاد، وکیل ءُ کماشانی اوشتارینگ بنت جست ءُ پرس کنگ بنت ءُ برے برے زندگ واتر نہ بنت۔ اے جاور تھنا بدامنی نہ انت بلکیں یک انچیں رھبندے ءِ بھر انت کہ ایشی ءِ بنریشگ ءَ بلوچ چاگرد تُرس ءُ بیم ءِ چیر ءَ بے تواری کنگ ءَ انت۔

بیان ءِ تہ ءَ دگہ وئیلانی بوتگ کہ 5 مارچ 2026 ءَ پنجگور ءِ دمگ پروم ءَ بوتگ اَنت کہ ایشی ءِ تہ ءَ سئے ورنا بیران بوتگ اَنت۔ ایشانی تہ ءَ زاکر بلوچ ء عبدین، عمر جان ءُ نیاز ء حاجی اللہ بخش ھوار اَنت۔ اے سئیں سبزل بازار، پروم ءِ مردم بوتگ انت ءُ پوریاگریں ورناہ بوتگ انت کہ آھاں وتی ھاندان ءِ زند گوں گاڑی ءِ ڈرائیونگ ءَ گوازینتگ۔

بیان ءِ رد ءَ کلری پروم ءَ سلاہ بندیں مردمانی تیرگواری ءَ چہ زاکر بلوچ ءِ سر ءَ تیر گواری کنگ بوتگ کہ ایشی ءِ آسر ءَ آ سک ٹپیگ بوتگ ءُ پد ءَ بیران بوتگ۔ ھمے وڑ ءَ ھمے دمگ ءَ عمر جان ءُ 24 سالی نیاز ھم تیرگواری ءَ چہ بیران بوتگ اَنت۔ اے وئیلاں دمگ ءِ تہ ءَ ترس ءُ بیم گیش کتگ ءُ آماچیں ھاندان سکیں غم ءُ جھٹکا ءِ آماچ اَنت۔

بلوچ یکجھتی کمیٹی ءَ گْوشتگ کہ بلوچستان ءَ زوراکیں بیگواھی، درکانودی ءِ کوش، دروگیں انکاؤنٹر ءُ نشانگ جوڑ کنگ ءِ وئیل مُدام گیش بوھگ ءَ اَنت ءُ ھاسیں رنگ ءَ بلوچ ورناھاں نشانگ کنگ ءَ اَنت۔ رمضان ءِ پاکیں ماہ ءَ ھم بلوچ ھاندان وتی کسان سالیں زھگانی لاشاں دست گرگ ءَ انت کہ بے تاھیرداریں گپے۔