چاردہ اُرشاں پاکستانی پوج ءِ چاردہ کارمندانی کوش، تھانانی سر ءَ دستیگ ءُ سلاھانی برگ ءِ زمہ واری بی ایل اے ءَ منّ اِتگ اَنت

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گوشتگ کہ مئے سرمچاراں کولواہ، مستونگ، سوراب، تربت، سامی، نوانو ءُ دشت ءَ پاکستانی پوج، آئی ءِ جھلی پوج ءُ ڈیتھ اسکواڈ نشانگ کتگ اَنت- اے اُرشاں زورگریں پوج ءِ چاردہ کارندہ کشتگ، وھدے کہ جتاجتائیں پولیس تھانانی سر ءَ دستیگ کتگ کارندہ دزگیر کتگ اَنت- اے میان ءَ سرمچاراں بُنجاھی شھدگانی سر ءَ ناکہ بندی جتگ بازیں کلاکاں تاں پٹ ءُ پول ھم برجاہ داشتگ-

جارکش ءَ گْوشتگ کہ شانزدہ فروری ءَ کولواہ ءِ دمگ بلور ءَ زورگریں پاکستانی پوج ءِ پیادگ ٹولی ءُ گاڑیانی کاروان ھما وھد ءَ نشانگ کتگ اَنت وھدے آ دمگ ءَ پیشگامی کنگ ءِ جُھد ءَ بیتگ اَنت- اُرش ءِ آسر ءَ یک کارندھے جاہ پہ جاھی مرتگ ءُ دو ٹپیگ بیتگ اَنت-

جارکش ءَ گْوشتگ کہ 24 فروری ءَ مستونگ ءِ دمگ گرگینہ ءَ بی ایل اے ءِ سرمچاراں شپ ءِ وھد ءَ پیشگامی کنوکیں زورگریں پوج ءِ سر ءَ سنگر گپتگ ءُ اُرش کتگ، چریشی ءِ سوب ءَ دُژمن پُشتکنزی ءَ لاچار بیتگ- دومی روچ ءَ زورگریں پوج ءَ دوبر پیشگامی ءِ جُھد کتگ یکرندے پد ءَ نشانگ کتگ – اے دوئیں میڑاں زورگریں پوج ءِ چار کارندہ مرتگ ءُ کم چہ کم ھپت ٹپی بیتگ اَنت-

جارکش ءَ دیمتر ءَ گْوشتگ کہ 26 فروری ءَ سوراب ءَ شال – کراچی بُنجاھی شھدگ سر ءَ بازیں کلاکاں تاں ناکہ بندی ءُ پٹ ءُ پول برجاہ داشتگ- اے میان ءَ زورگریں پوج ءُ وتگاڑیں سی ٹی ڈی ءَ پُترگ جُھد کتگ، چریشی ءَ سرمچاراں سی ٹی ڈی ءِ بکتر بند گاڑی ریموٹ کنٹرول آئی ای ڈی (IED) اُرش ءِ نشانگ کتگ- تراک ءِ آسر ءَ گاڑی ناکاراہ بیتگ ءُ یک کارندھے مرتگ-

جارکش ءَ گوشتگ کہ ھمے روچ ءَ کیچ ءِ دمگ تربت کلاتک ءِ ھند سر ءَ پولیس تھانہ سرجمی ءَ دستیگ کتگ- سرمچاراں اود ءَ ھستیں سلاہ ءُ دگہ پوجی سامان وتی دستیگ کنگ ءَ پد تھانہ ءِ سرویلنس ٹاور تراک ءَ چہ تباہ کتگ- اے کاروائی ءِ میان ءَ شھدگ سر ءَ دو کلاکاں تاں ناکہ بندی برجاہ داشتگ – زورگریں پوج ءَ بکتر بند گاڑیاں چہ پیشگامی کنگ جُھد کتگ چریشی ءَ سرمچاراں تُرندیں اُرش ءَ پُشتکنزی کتگ اَنت-

جارکش ءَ گْوشتگ یک مارچ ءَ مستونگ ءِ دمگ کردگاپ ءَ پیشگامی جُھد کنوکیں زورگریں پوج نشانگ کتگ، چریشی ءَ دُژمن ءَ مزنیں کچے ءَ جانی ءُ مالی تاوان چست کنگ کپتگ-

جارکش ءَ گوشتگ ھمے روچ ءَ بلیدہ ءِ دمگ نوانو ءَ زورگریں پوج ءِ کاروان ءَ ھوار گاڑی یے آئی ای ڈی اُرش ءَ نشانگ کتگ چریشی ءَ دُژمن ءَ تاوان چست کنگ کپتگ-

جارکش ءَ گْوشتگ کہ سے مارچ ءَ تربت ءِ ھمگرنچیں دمگ نودز ءِ ھند سر ءَ بُنجاھی شھدگ سر ءَ دو کلاکاں تاں گیش ناکہ بندی کتگ- اے میان ءَ زورگریں پوج ءَ ڈیتھ اسکواڈ ءِ ھمراھی ءَ کاروان ءِ دروشم ءَ پُترگ جُھد کتگ، چریشی ءَ سرمچاراں تچکی ءَ اُرش ءِ نشانگ کتگ اَنت- اُرش ءَ دو موٹر سئیکلاں ھوار دُژمن ءِ بکتر بند گاڑی ءَ سکا تاوان رس اِتگ ءُ سے کارندہ جاہ پہ جاھی مرتگ اَنت-

جارکش ءَ گْوشتگ ھمے شپ ءَ تربت ءِ دمگ ناصر آباد ءَ نوکیں سلاہ ءُ تھرمل اسکوپس ءَ چہ اسپیشل ٹیکٹیکل آپریشنز اسکواڈ (STOS) ءِ سرمچاراں زورگریں پوج ءِ کاروان سر ءَ سنگر گپتگ ءُ اُرش کتگ – اُرش ءَ بکتر بند ءَ ھوار سے گاڑی تچکی ءَ نشانگ ءَ اتکگ اَنت، چریشی ءِ آسر ءَ پنچ کارندہ مرتگ ءُ بازین ئِے ٹپی بیتگ-

جارکش ءَ گْوشتگ کہ ھمے روچ ءَ کیچ ءِ دمگ سامی ( کلگ) ءَ زورگریں لشکر ءِ پوسٹ سر ءَ بازیں راکٹے آس داتگ کہ گوں سوبمندی ءَ چہ وتی نشانگ ءَ کپتگ اَنت، چریشی ءَ چہ دُژمن ءَ جانی ءُ مالی تاوان چست کنگ کپتگ-

جارکش ءَ گوشتگ کہ چار مارچ ءَ سامی ءِ دمگ کلگ ھپتاری ءَ سی پیک دگ سر ءَ زورگریں لشکر ءِ کاروان ءَ ھوار یک گاڑی یے ریموٹ کنٹرول آئی ای ڈی اُرش ءَ نشانگ کتگ، چریشی ءَ چہ بازیں کارندھے مرتگ ءُ ٹپی بیتگ اَنت- ھمے روچ ءَ دشت کھڈان ءَ ھم یک پوجی پوسٹ ءِ سر ءَ مزنیں سلاھاں چہ نشانگ تاوان داتگ-

جارکش ءَ گوشتگ تربت شھر ءَ تعلیمی چوک سر ءَ برجاہ پوجی پوسٹ ءُ پسنی شھر ءَ کسٹم کارگس دستی بمباں نشانگ کتگ ءُ تاوان داتگ اَنت-

جارکش ءَ گوشتگ بلوچ لبریشن آرمی تچک کنت کہ زورگریں پاکستانی پوج ءُ آئی سرجمیں پوجی ءُ مالی مپادیں گل تچکی ءَ نشانگ ءِ سر ءَ اَنت- مئے اے کاروائی اے پھازی راھبندانی درچ اِنت، چریشی ءِ مول ءُ مراد سرڈگار بلوچستان ءَ چہ پاکستان ءِ گیر پتری زورگری ءِ سرجمی ءَ ھلاسی اِنت- دُژمن ءِ پوجی شوربندی، آئی ءِ دمگی کمکار ءُ پُلپانچیں شوربندیانی سر ءَ اُرشاں ترندی ءَ وھد ءِ ھمراھی ءَ گیش کن ایں- بی ایل اے وتی راجی زمہ داریاں چہ سرجمی ءَ سرپد اِنت ءُ بلوچستان ءَ سرجمی ءَ وتواجھی ءَ تاں سلاہ بندیں گھگیری ءِ درچ برجاہ بیت-