چہ پنجگور ءَ گوستگیں ھپتگ ءَ گاڑی سواریں ناشناسیں سلاہ بندیں مردماں یک مردمے آوار جتگ کہ مرچی آئی ءِ لاش چگل دیگ بیتگ۔
گیشیں ھالانی رد ءَ پنجگور ءِ دمگ خدا آبادان ءِ نندوکیں عبدالحلیم گوستگیں ھپتگ ءَ تراوی نماز ءَ پد ناشناسیں سلاہ بندیں مردماں توپک ءِ زور ءَ آوار جتگ ءُ ناشناسیں جاھے ءَ برتگ۔
دمگی مردمانی رد ءَ مرچی عبدالحلیم ءِ لاش پنجگور ءِ دمگ سریکوران ءَ دزکپتگ ۔
دمگی مردمانی رد ءَ آوار جنوک گوں سرکاری کمک ءِ سلاہ بندیں گلے ءَ ھمگرنچ اَنت کہ دمگی رنگ ءَ ”ڈیتھ اسکواڈ“ ءِ نام ءَ زانگ بنت۔
پنجگور ءَ گوستگیں ماہ ءِ تہ ءَ اے وڑیں وئیلانی تہ ءَ مزنیں گیشی یے گندگ بوتگ۔ دمگی اھوالانی کہ ایوک ءَ گوستگیں ماہ ءَ چہ جتا جتائیں دمگاں کم چہ کم دوازدھیں مردمانی لاش دزکپتگ اَنت۔
گیش گوشگ بوتگ دزکپتگیں گیشتریں لاش ھما مردمانی بوتگ اَنت کہ پیسر ءَ زوراکی ءَ بیگواہ کنگ بوتگ اَنت ءُ بازیں وھدے ءَ چہ بیگواہ بوتگ اَنت۔ اے وئیلانی برجاہ دارگ ءَ دمگ ءَ ترس ءُ ناامیتی تالان بوتگ۔