بلوچستان ءِ جتا جتائیں جاھاں پاکستانی پوج ءِ دست ءَ سے براتاں ھوار ھشت مردم زورانسری بیگواہ کنگ بیتگ انت-
بلوچستان ءِ دمگ پنجگور ءَ پاکستانی لشکر ءَ سَے براتاں ھوار پنچ مردم دزگیر کتگ ءُ بیگواہ کتگ انت ۔
اے بیڑ گوستگیں شپ ءَ پنجگور ءِ دمگ خدا آبادان ءَ کنگ بوتگ کہ اود ءَ بازیں لوگانی سر ءَ اُرش کنگ بوتگ۔ دمگی مردمانی گشگ اِنت کہ بیڑ ءِ وھد ءَ جنین ءُ چُک لٹ شاپ بوتگ اَنت ءُ لوگانی سامان ھم شنگ ءُ شانگ کنگ بوتگ اَنت۔
بیگواھیں مردمانی پجار بختیار حاجی محمد حسن ، عرفان ء حاجی محمد حسن، بلال ء حاجی محمد حسن، اویس احمد ء یار محمد ءُ حسن ء خلیل ءِ ناماں زانگ بوتگ انت۔
کھول ءِ گشگ ءِ رد ءَ بختیار، عرفان ءُ بلال برات اَنت۔
دمگی مردمانی گشگ انت کہ بیڑ ءِ وھد ءَ تیر گواری ھم بوتگ کہ ایشی ءِ تہ ءَ اویس احمد ٹپی بوتگ۔
کھول ءِ گشگ اِنت کہ لشکر ءَ آ ٹپیگیں جاوراں گوں وت برتگ بلے آھانی انوگیں جاور ءُ جاہ ءِ بابت ءَ ھچ وڑیں ھال ءُ اھوال دیگ نہ بوتگ۔
ھمے وڑ کیچ ءِ بنجاھی شھر تربت ءَ گوستگین شپ ءَ امداد ء ابراھیم جھمنند کولوائی بازار آپسر، ءِ نام ءَ زانگ بیتگ – کھول ءِ گوشگ انت امداد بلال اسٹیشنری ءِ نام ءَ فدا چوک ءَ کار ءَ بیتگ-
کھول ءِ گوشگ انت گوستگیں شپ ءَ کساس ساھت دو ءَ پورسز ءَ بیڑ برتگ ءُ آ چہ لوگ ءَ آوار جتگ ءُ برتگ-
دومی نیمگ ءَ ھب ءُ دالبندین ءَ ھم دو مردم زورانسری آوار جنگ بیتگ انت-
دالبندین ءَ پوج ءَ عامر ء احمد دزگیر کتگ ءُ گون وت برتگ- ھمے وڑ چہ حب چوکی ءَ غلام سرور ء عیدو دزگیر کتگ ءُ گون وت برتگ-
ھمے وڑ چہ نوشکی ءَ بیگواہ بیتگین محسن ءُ چہ خاران ءَ آوار جنگ بیتگیں شاہ زیب یل بیتگ ءُ وتی وتی لوگاں سر بیتگ انت-