بلوچستان ءِ دمگ پنجگور ءَ گوستگیں ھپتگ ءِ تہ ءَ 8 لاش دزکپتگ انت۔ چہ دمگی مردم ءُ کھولانی رد ءَ ھما درستیں لاش کہ تاں انوگ ءَ پجارگ بوتگ اَنت آ زورانسری ءَ بیگواہ کنگ ءِ آماچیں مردمانی لاش اَنت۔
نوکیں وئیل ءِ تہ ءَ مرچی پنجگور ءَ دگہ دو لاش دست کپتگ انت کہ ایشانی تہ ءَ یکے جنگیان ء عبدالرشید ءِ نام ءَ زانگ بوتگ کہ گْوشگ بیتگ کہ آ پنجگور ءِ دمگ پروم ءِ نندوک اِنت۔ دگہ لاشے ءِ انگت ءَ پجار نہ بوتگ۔
کھول ءِ رد ءَ جنگیان 26 مئی 2025 ءَ پنجگور ءِ دمگ پروم ءَ پاکستانی لشکر ءَ گوں چار دگہ سیاد ءُ وارساں ھوار آوار جتگ ءُ کھول ءِ گشگ اِنت کہ دگہ مردم پد ءَ یل کنگ بوتگ اَنت بلے جنگیان ءِ بابت ءَ ھچ وڑیں ھال ءُ اھوال دیگ نہ بوتگ۔
جنگیان ءِ مستریں برات ملک میران ءَ سوشل میڈیا ءِ سر ءَ وتی بیان ءَ گْوشتگ کہ آئی ءِ برات پاکستانی لشکر ءُ آیانی چیردستی ءَ ھستیں سلاہ بندیں گلے ءَ دزگیر کُتگ ءُ دمگی درچ ءَ ڈیتھ اسکواڈ ءِ نام ءَ زانگ بیت ءُ پاکستانی لشکر ءِ کیمپ ءَ برتگ اش۔
دمگی چاگردی مردمانی رد ءَ گوستگیں ھپتگ ءِ تہ ءَ چہ پنجگور ءَ 8 لاش دزکپتگ انت۔ آھانی گشگ انت کہ ھما درستیں لاش کہ پجار کنگ بوتگ انت آ ھما مردمانی بوتگ انت کہ آہانی لوگ ءِ مردماں پیسرا چہ آہانی زورانسری ءَ بیگواہ کنگ ءِ اھوال دیم ءَ آورتگ انت ۔