بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں بیانے ءِ تہ ءَ گْوشتگ کہ گل ءِ جار اِنت کہ گل ءِ نوکیں ھوائی ءُ ڈرون جنگی یونٹ ”کَھر“ (QAHR – Qazi Aero Hive Rangers ) سرجمی ءَ بندات کنگ ءَ اِنت، ءُ آپریشن ءِ وھد ءَ وتی بنداتی کارروائیاں سوبمندیں رنگے ءَ سرجم کتگ۔
جارکش ءَ گوشتگ کہ کَھر بی ایل اے ءِ جنگی دیمروئی ءِ ھما پڑ اِنت کہ ایشی ءِ مول ءُ مراد بلوچ جنگ ءَ را نوکیں جنگی لوٹانی گوما ھمگرنچ کنگ اِنت۔ اے یونٹ گل ءِ زانشتی وژن ءِ درچ اِنت کہ جنگ ءَ نہ ایوک ءَ پدراھی ءِ دروشم ءَ بلکیں منسوبہ بندیں، سائنسی ءُ پائیداریں ھکمت املی ءِ دروشم ءَ دیم ءَ برگ ءِ سر ءَ ستک کنت۔ کھر یونٹ گل وتی مزنیں کمانڈر عبدالباسط زہری پنام ءِ قاضی ءِ ہکری ءُ گل ءِ میراس ءَ گوں بندوک کتگ کہ آئی ءَجنگی درچانی تہ ءَ ٹیکنالوجی، پٹ ءُ پول ءُ ادارہ سازی ءَ را بنیاتی ارزشت داتگ ءُ ”کھر“ ءِ جوڑ کنگ ءَ مزنیں کردے پیلو کتگ۔
آئی ءَ گوشتگ کہ کھر ءِ اولی املی آپریشن ھیروپ دوم ءِ وھد ءَ کنگ بوتگ انت۔ اے کارروائیانی تہ ءَ گیشتریں کارروائی گوادر بندرگاہ ءِ سر ءَ مھکم ءُ ھمگرنچیں ڈرون اُرش بوتگ اَنت۔ اے اُرشاں دژمن ءِ فوجی بنیاتی ڈھانچہ، بندرگاہ ءِ آسراتی ءُ رھوتی ءِ بنیاتی ڈھانچہ نشانگ جوڑ کتگ ءُ دژمن ءَ را جانی ءُ مالی تاوان بوتگ۔ اے اُرش نہ ایوک ءَ جنگی ھوالگ ءَ پیسلہ کنوک سابت بوتگ بلکیں ایشاں بلوچ راجی آجوئی تھریک ءِ جاورانی تہ ءَ یک نوکیں رنگے ودی کت۔
آئی ءَ گیش گوشتگ کہ ڈرون ٹیکنالوجی ءِ کارمرد کنگ ءَ چہ گل ءَ را نہ ایوک ءَ دراجیں دوری ءِ اُرش کنگ ءِ توان رس اتگ بلکیں دژمن ءِ گچینی دمگانی تہ ءَ سر بوھگ ءِ توان ھم رس اتگ، آھانی سر ءَ نگرانی کنگ ءُ نا اُمیتیں ساھتاں آھاں نشانگ جوڑ کنگ ءِ توان ھم داتگ کہ ایشی ءَ چہ زمینی جنگ ءِ دمگ ءَ دریں دگنیا ءَ مھکم کنگ پیداک بیت۔ بی ایل اے اے گپ ءَ سرپد بیت کہ نوکیں جنگ ءِ میدان ایوک ءَ زمین ءِ سر ءَ نہ اِنت بلکیں برز ءُ سائبر اسپیس ءَ ھم دیم ءَ شُتگ ءُ کھر ھمے دمگاں گل ءِ ھست بوھگ ءِ بنداتی بلے سرجمیں درشان اِنت۔
آپریشن ھیروپ دوم ءِ جتا جتائیں پڑاں کنگ بوتگیں ڈرون ءِ اُرشاں دژمن ءِ سر ءَ جنگ ءِ بنچک ءَ زور پیداک کتگ ات کہ ایشی ءِ سان دژمن ءِ زمینی ہورسز ءِ ھوسلہ، سر ءُ پر ءُ پدمانکی ءِ پشتمانک ءِ سر ءَ پدر گندگ بوتگ ۔
جارکش ءَ گْوشتگ: بلوچ لبریشن آرمی جار جنت کہ کھر یونٹ آیوکیں وھد ءَ ھم گل ءِ رھبند ءِ یک ھاسیں بھرے ءِ بستار ءَ مانیت ءُ ایشی ءِ درچ ءَ گل ءِ جنگی توانائی گیشتر گیش کنگ بنت۔ اے یونٹ نہ ایوک ءَ دژمن ءِ ھلاپ ءَ کارروائیانی تہ ءَ کارمرد کنگ بیت بلکیں انٹیلی جنس، کمیونیکیشن نیٹ ورک، ءُ زمینی یونٹانی کمک ءُ ھمگرنچی ءِ وڑیں سرجمیں پڑ نوں اے برزی یونٹ ءِ پتر ءَ ھوار کنگ بنت۔
گڈسر ءَ گشتگے کہ بی ایل اے اے گپ ءِ سر ءَ باور کنت کہ راجی گھگیری ھما وھد ءَ پائیدار بوت کنت کہ آ پکری، سائنسی، ءُ ٹیکنالوجی ءِ پڑ ءَ دژمن ءِ دیم ءَ اوشتات کنت۔ کھر اے دراجیں گھگیری سپر ءِ بنداتی پدانک اِنت کہ آجوئی ءِ جھد ءَ نوکیں دورے ءَ سر کنت، ھما دور ءَ کہ اود ءَ برز ءِ لوت، انفارمیشن ءِ ھاکمیت، ءُ ٹیکنالوجی ءِ سنچ آسر دار اَنت کہ سیاسی ھیالاں امل ءِ تہ ءَ بدل کن اَنت۔