بلوچ لبریشن آرمی ءَ31 جنوری ءَ آپریشن ھیروپ ءِ دومی بھر ءَ شال ءِ گچینی جاہ ریڈ زون ءِ دمگ ءَ فدائین اُرشکار ءِ ویڈیو ءُ پجار وتی میڈیا چینل ”ھکل“ ءَ شنگ کتگ۔
گل ءَ اُرش کنوک ءِ پجار قدرت اللہ کرد پنام ءِ مجید ءِ نام ءَ کتگ کہ آ بدل خان کرد ءِ چُک اِنت ءُ مستونگ اسپلنجی ءِ نندوک اِنت۔
ویڈیو ءَ ارش کنوک ٹپیگیں جاوراں گندگ بیت کہ شال ءِ شھر ءَ دستیگ کنگ ءِ وھد ءَ بوتگیں جنگ ءُ چوپاں ٹپی بوتگ۔ بی ایل اے ءِ رد ءَ فدائین قدرت اللہ سک ٹپی بوھگ ءَ ابید وتی مشن ءَ سوبمندیں رنگے ءَ سرجم کنگ ءَ سوبین بوتگ۔
بی ایل اے ءَ فدائین اُرشکار ءِ درگت ءَ گوشتگ شھید فدائین قدرت اللہ کرد پنام ءِ مجید بلوچ ھما ورنایانی تہ ءَ ھوار اِنت کہ آئی ءِ زند ءِ سفر کسان اِنت بلے مانا دراج اِنت۔ آئی ءِ جھد ھما نسل ءِ نمائندگی کنت کہ آ ھچ وڑیں جاوراں جوش ءُ جزبگ یا ازاروکی جذبگ ءِ چیر ءَ گھگیری ءِ راہ ءَ نہ روت بلکیں گوں یک ھاسیں زانشت ءُ پیسلے ءَ رؤت۔
گوشگ بوتگ کہ قدرت اللہ گل ءِ تہ ءَ ھوار بوھگ ءَ پد وتی سنگینی، تھمبل ءُ مھکمیں تب ءِ وسیلگ ءَ وت ءَ یک انچیں باسکے ءِ بستار ءَ پیش داشت کہ آئی ءَ را سک کمیں وھد ءِ تہ ءَ گران تریں زمہ واری ءِ ڈبو کنگ بوت کنت۔ مجید بریگیڈ ءِ تہ ءَ ھوار بوھگ ایوک ءَ فوجی تربیت ءِ آسر نہ اِنت بلکیں زھنی ءُ شرپداری پڑ ءَ چہ گوزگ ءَ پد زرتگیں زمہ واری اِنت ءُ قدرت اللہ ءَ اے پڑ گوں پھتوی ءَ زرتگ۔
گل ءِ رد ءَ آپریشن ھیروپ ءِ وھد ءَ شال ءِ جنگ آئی ءِ زند ءِ گڈی بلے برجمیں رنگے ءَ سابر بوتگ۔ آئی ءَ ریڈ زون ءِ نزیک ءَ ریل ءِ اسٹیشن ءَ گوں دژمن ءِ لشکر ءَ کلاکانی میان ءَ جنگ کتگ۔
“آئی ءَ ترندیں جنگ ءُ چوپ ءِ وھد ءَ تیر وارتگ بلے ٹپی بوھگ ءَ ابید آئی ءِ رھبند ءَ نہ لرزانک ءُ نہ کہ بے تاھیری بوتگ۔ آ یک انچیں سکونے ءِ گون ءَ بوتگ کہ ایوک ءَ یک انچیں مردمے ءَ کیت کہ آئی ءِ پیسلہ ءَ سرجم ءَ ھوار بوتگ۔”
گوشگ بوتگ کہ آئی ءِ گڈی ساھت اے ویڈیو ءِ تہ ءَ گندگ بیت انت۔ تراکناکیں چیزاں پُریں گاڑی یے ءِ تہ ءَ نشتگ ءُ گوں تبے ءَ وتی سنگتاں چہ رکست کنت۔ آئی ءِ دیم ءَ نہ ترس اِنت ءُ نہ بے وسی، بلکیں یک گھتریں رزامندی یے گندگ ءَ کیت۔ آ وتی سنگتاں گُش ایت کہ ما یکجاہ ایں، ما داں آجوئی ءَ یکجاہ ایں، اے (پاکستان) ءَ بے تاوان ءَ یل مہ کن اِت۔
اے میان ءَ آئی ءِ سنگتاں چہ یکے آئی ءِ پیشانی ءَ بوسگ دنت ءُ رکست کنت ءُ آ وت گوں آرامی ءَ گاڑی ءَ ریڈ زون ءِ نیمگ ءَ جنزان کنت ءُ اود ءَ وتی نشانگ ءَ لگّ اِیت ءُ شھید بیت۔
گل ءَ گیشتر آئی ءِ بارو ءَ درشان کتگ ءُ گْوشتگ کہ قدرت اللہ ءِ جند ءِ سرپد بوگ ءِ واستا آئی ءِ گُڈّی ساھتانی گندگ بس اِنت۔ گھگیری ءِ پڑ ءَ مستریں تاکت زانت ءُ ترندی نہ اِنت بلکیں ھما بے تواری ءِ باور اِنت کہ انسان ءَ چہ وتی آسر ءَ بے ترس کنت۔ آئی ءِ بچکندگ ھمے باوست ءِ چیدگ انت۔
بی ایل اے ءِ رد ءَ آئی ءِ ناکوزتک شھید فدائی عبدالسلام پنام ءِ نصراللہ ھم ھمے جُھد ءِ بھر بیتگ ءُ شھید کنگ بوتگ۔ شھید فدائی قدرت اللہ کرد پنام ءِ مجید بلوچ ءِ زند ءُ شھادت مارا اے دربرگ ءَ دنت کہ گھگیری ایوک ءَ جنگ ءِ میدان ءَ نہ بیت بلکیں اے ھما ساھت ءَ ھم ھست اِنت کہ مردم گوں وتی پیسلگ ءَ سرجم ءَ آرام ءَ اوشتات کنت۔ گوستانک ءِ تہ ءَ زبردستیں توار ھما بے تواری ءِ بچکند اِنت کہ آسر ءَ پیسر دیم ءِ سر ءَ مانیت۔
زانگ بہ بیت کہ شال ریڈ زون ءِ فدائین اُرش ءَ ڈپٹی کمشنر پولیس ءَ ھوار دوازدہ ءَ چہ گیش سیکورٹی کارندہ بیران بوتگ اَنت، ایشی ءَ پد درجناں سلاھبند ریڈ زون ءَ سر بوتگ اَنت ءُ ترندیں تیرگواری اش کتگ۔
بی ایل اے ءِ رد ءَ آپریشن ھیروپ ءِ دومی بھر ءِ وھد ءَ بلوچستان ءِ چاردہ شھراں اُرشانی تہ ءَ 93 سنگت شھید بوتگ اَنت کہ آھانی تہ ءَ 50 فدائین ھم ھوار اَنت ءُ اے وھد ءَ بی ایل اے ءَ 362 ایف سی، نیوی، آئی ایس آئی، سی ٹی ڈی ءِ کارندہ کشتگ اَنت کہ آھانی تہ ءَ ڈیتھ اسکواڈ ءِ مردم ھم ھوار اَنت۔
گل ءَ بازیں کارندھانی دزگیری ءِ جار ھم جتگ کہ آیانی بابت ءَ گشگ بوتگ کہ پٹ ءُ پول سرجم بوھگ ءَ پد پیسلہ بلوچ راجی آمیدگس ءَ جار جنگ بیت۔