آپریشن ھیروپ فیز ٹو سیمی روچ ءَ برجاہ انت، 58 کلاکانی گوزگ ءَ ہد بازیں جاھاں کنٹرول برجاہ انت- بی ایل اے

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں یک بیانے ءِ تہ ءَ گْوشتگ: آپریشن ھیروف فیز ٹو سیمی روچ ءَ سر بوتگ ءُ 58 کلاک گوزگ ءَ پد ھم بلوچستان ءِ جتا جتائیں دمگاں آپریشن برجاہ اِنت۔ سرمچار بازیں جاھاں مھکمیں پوزیشن ءَ اَنت۔ نوشکی شھر ءَ پاکستانی لشکر ءِ بنجاھی بنجل ءِ یک بھرے دستیگی ءَ انت کہ اود ءَ زورگیریں لشکر پشکنزی ءُ واتری ءِ آماچ انت- گْوستگیں سئے روچ اِنت بلوچ سرمچار گوں تمردی ءُ بھادری ءَ جنگ ءَ اَنت، یکشل ءَ دشمنیں پوج ءِ ساھاں گران انت ءُ بنجلاں سنگراں گران انت ءُ بازیں جاھاں زورگریں لشکر ءِ رِٹ ھلاس بوتگ-

ترجمان ءَ گوشت کہ بنداتی ءُ کساسی ھالانی رد ءَ پاکستانی زورگیریں فوج، پولیس، سی ٹی ڈی ءُُ فوج ءِ نیمگ ءَ جوڑ کتگیں ڈیتھ اسکواڈ ءِ کارندھانی کلیں مرتگینانی کساس تاں انوگ ءَ 220 ءِ نزیک ءَ سر بوتگ۔ اے کچ ءُ کساس ھلاس نہ اَنت ءُ زمینی جاور ھال ءِ رد ءَ دژمن ءَ را بوتگیں تاوان ءِ گیش بوھگ ءِ گمان اِنت۔ دژمن ءِ بیرانی ءُ مال ءُ مڈی ءِ سرجمیں ءُ گڈی ھال چہ جم کنگ ءَ پد زوت رسانکدر ءَ شنگ کنگ بنت۔

آئی ءَ گْوشتگ کہ آپریشن ءِ وھد ءَ بلوچ لبریشن آرمی ءِ شھید بوتگیں سرمچارانی کچ تاں انوگ ءَ بیست ءُ ھپت ءَ سر بیتگ کہ ایشانی تہ ءَ مجید برگیڈ ءِ 14 شھید، 8 فتح اسکواڈ ءُ 5 ایس ٹی او ایس یونٹ ءِ شھید سرمچار ھوار اَنت۔ شھیدانی گڈی ھال دیمترا شنگ کنگ بنت۔

آئی ءَ دیمترا گْوشتگ: نوشکی انگت ءَ بلوچ لبریشن آرمی ءِ چیر دستی ءَ اِنت ءُ دگہ بازیں جاھاں سرمچار وتی پلہ مرزی ءَ برجاہ دارگ ءَ اَنت۔ ھما دمگاں کہ آپریشن ءِ سرجمی ءِ جار جنگ نہ بوتگ، جاور ھال انگت ءَ برجم اَنت ءُ آپریشن برجاہ اِنت۔ بلوچ لبریشن آرمی یک رندے پد ءَ گوں بلوچ راج ءَ دزبندی کنت کہ آ پھریز بہ کن اِت، دژمن ءَ گوں ایمنیں دوری بہ دار اِت، ءُ یکمشت ءُ زمہ واری ءِ گون ءَ ھمکاری ءَ برجاہ بہ دار اِت، انچوش کہ گوستگیں سئے روچاں سرمچاراں ھمراھداری کنگ بوتگ۔ آپریشن ھیروپ انگت ءَ برجاہ اِنت ءُ گامگیج ءِ بابت ءَ گیشیں زانتکاری وھد ءِ سر ءَ دیگ بیت۔