نوشکی ءَ تراک ءُ تیرگواری، جاور ھال یکشل ءَ ناگیگ

بلوچستان ءِ سیمسری شھر نوشکی ءِ شمبے ءِ روچ ءِ سُھب پنچ ءِ نزیک ءَ تُرندیں تراکاں سرجمیں شھر جُنز اِتگ- گرانیں واب ءَ وپتگیں شھری اناگاہ ءَ تراکاں جکس اِتگ – بنداتی تراکاں پد تیرگواری ءِ دراجیں درچ بندات بیتگ کہ گُڈی ھالاں تاں برجاہ ءَ اِنت-

دمگی اِھوالکار ءِ رِد ءَ شھر ءِ جتاجتائیں دمگاں چہ توار اش کنگ بیگ ءَ اِنت- جاورھال اے وھد ءَ سک ناگیگ بیتگ اَنت وھدے یکشمبے ءِ سُھب دو ھیلی کاپٹراں چہ سلاہ بندیں مردمانی سر ءَ شینلگ ءِ ھال سر بیتگ- شھریاں ڈپٹی کمشنر ھاؤس نیمگ ءَ دیت چست بیگ ءَ گندگ بیتگ اَنت، چریشی ءَ چہ جاور ناگیگی زانگ بیت-

یکشمبے ءِ روچ بلوچستان ءِ سر وزیر سرفراز بگٹی ءَ یک پریس کانفرنسے ءَ ٹاہ داتگ کہ نوشکی کلیئر کتگ ءُ جاور ھکومت ءِ کنٹرول ءَ اِنت بلے دمگی آبادی ءَ چہ اے ٹاہ تپاکی گندگ نئیت – شھریانی رِد ءَ شھر ءَ تنی وھدے ھم جاور ناگیگ اَنت- نوشکی بازار گوستگیں دو روچ ءَ چہ سرجمی ءَ بند اِنت، وھدے کہ این – 40 آر سی ڈی شھدگ ھم سلاہ بندیں مردمانی کنٹرول ءَ اِنت-

دمگی اِھوالکار ءِ ھم گوشگ بیتگ کہ نوشکی پولیس تھانہ سر ءَ سلاہ بندیں مردماں دستیگ کنگ ھال اِنت، وھدے کہ شھر ءِ بازیں دمگاں پوج ءِ ساڑی بیگ گندگ بیتگ- یکشل جاور ناگیگی سبب ءَ مردم لوگ ءَ تہ ءَ اَنت ءُ ھمکروچی زندگی سرجمی ءَ اسرمند بیتگ اَنت-

دو روچ ءَ چہ لین دیگ بند اِنت، چریشی ءِ سوب ءَ شھریاں تُرندیں دلسیاھی ءِ دیمپان اِنت- اشی ءَ اَبید موباھل نیٹ ورک بندی ءُ سرکاری کارگس ءِ موکلی ءِ سوب ءَ اِھوالکاراں ءُ دمگی مردم دمگ ءَ چہ ھال رسگ دلسیاھی ءِ دیمپان اِنت-

نوکیں ھالانی رِد ءَ شھر ءِ بازیں بھر انگت سلاہ بندیں مردم ساڑی بیگ گپ ترگ ءَ اِنت- دمگی اِھوالکار ءِ گوشگ اِنت کہ نوشکی شھر اے وھد ءَ سرجمی ءَ دست ءَ اِنت ءُ شھر چاریں نیمگاں چہ انگیر ءَ کتگ اَنت – جتاجتائیں دمگاں ءُ گلی کُچگ سلاہ بندانی گشت کنگ ھال ھم سر بیتگ-

اے جاور ھال ھمے وھد ءَ دیم ءَ اَتکگ وھدے بلوچ لبریشن آرمی یک روچے ساری سرجمیں بلوچستان وتی ‘ آپریشن ھیروگ فیز ٹو ” بندات جار جتگ – گل ءِ جارکش جیئند بلوچ ءِ رِد ءَ اے آپریشن سی پنچ کلاکانی گوزگ ءَ اَبید گوں تُرندی ءَ برجاہ ءَ اِنت- اے درشان ءِ رِد ءَ نوشکی، شال ءُ دگہ دمگاں گل ءِ سلاہ بندیں مردمانی دستیگ برجاہ ءَ اِنت ءُ بازیں سرکاری شوربندی، پوج ءِ بُنجل ءُ چوکیانی سردستیگ کتگ اَنت-

جارکش ءِ رِد ءَ جتاجتائیں دمگاں ” دژمن ءِ پوجی ءُ انتزامی ساڑی ” پُشتکنزی کتگ اَنت ءُ زورگریں پوج ءَ زور ءِ دیمپانی اِنت – بلے ھکومتی ھساب ءَ اے ٹاہ پدر کنگ نہ بیتگ اَنت، ءُ سرکاری درشان ءِ جتا اَنت-

اے وئیلاں یکرندے پد ءَ بلوچستان ءِ ناگیگیں سکیورٹی جاور ھال راجی ءُ میانی استمانی ھساب ءَ دلگوشگور ءِ بُنجاہ جوڑ بیتگ- بلے زمینی راستی، سرکاری درشان ءُ دمگی آبادیانی ٹاھانی میان ءَ ساڑی تچکی جاور گیش ھیرانی جوڑ بیتگ-

ودی بیتگیں اے جاورھال دگہ یک گچین ءِ بیسے ھم ودی کتگ- بلوچستان ءَ ھستیں سلاہ بندیں زرمبشت ءَ پاکستان ءِ سرکاری ءُ پوجی درشان سرجمی ءَ رد کتگ اَنت- لھتے ماہ ءَ ساری پاکستانی پوج ءِ سروک ءِ نیمگ ءَ اے ٹاہ دیگ بیتگ کہ بلوچستان ءَ سلاہ بندیں مردمانی کچ تھنا یک ھزار پنچ سد ءُ دوھزار ءِ نزیک ءَ اَنت ءُ اے یک محدود ٹولی یے، بلے زمینی راستی اے ٹاہ ءَ یک جتا پیشدار اِیت- رقبہ ءِ رِد ءَ مزنیں دمگاں گوستگیں دو روچاں چہ بازیں دمگ سلاہ بندیں مردمانی دست ءَ اِنت، وھدے کہ پاکستانی پوج ءُ سکیورٹی ادارھانی ساڑی بیگ گیشتر وتی بُنجلاں ءُ چوکیاں تاں مھدود گندگ بیگ ءَ اَنت-

زانتکارانی رِد ءَ اے جاور ھال ناں تھنا سلاہ بندیں گلانی گیشی توانمندی ءَ پیشدار اِیت بلکیں اے گپ ءَ ھم نشان کنت کہ آیاں دمگی ھساب ءَ راجی پلامرزی گون اِنت- ھمے سوب اِنت کہ ھکومتی ٹاھاں ابید زمینی جاور یکشل ءَ بے ستکی ءُ اڑوکی پیشدارگ ءَ اِنت، کہ بلوچستان ءَ دیریگیں جیڑہ ءِ ناگیگی ءُ سنگینی ءَ گیش پدر کنت-