بی ایل اے ءِ آپریشن ھیروپ برجاہ: جنگولیں زالبول ءِ فرنٹ لائن ءِ تامری کلوہ شنگ

بلوچ لبریشن آرمی ءِ آپریشن ھیروپ ءِ اُرشانی درچ جتا جتائیں جاھاں دومی روچ ءَ برجاہ انت-

بلوچ لبریشن آرمی ءِ آفیشل چینل ھکل ءَ گوادر ءَ پاکستانی پوج ءِ ھلاپ ءَ اُرشاں ھواریں زالبولیں باسک ءِ پجار ءُ جنگانی وھد ءِ تامر شنگ کتگ-

بی ایل اے ءَ زالبولیں فدائین ءِ باسک ءِ پجار ھوا بلوچ پنام ءِ دروشم ءِ نام ءَ کتگ بلے آئی ءِ بابت ءَ گیشتریں ھال ءُ اھوال نہ داتگ انت۔

بلوچ لبریشن آرمی ءِ ھمگرنچیں اُرشانی سلسلہ کہ شمبے ءِ سھب ءَ بندات بوتگ اَنت انگت گوادر ءِ نوشکی ءَ ھوار دگہ دمگاں ھم برجاہ اَنت۔

دگہ رسانکدراں ھوا بلوچ ءِ پجار یک نبشتہ کارے ءِ بستار ءَ داتگ ءُ گْوشتگ کہ ھوا بلوچ ءِ پت ھم گوں بلوچ سلاہ بندیں گلے ءَ ھمگرنچ بوتگ ءُ گوں پاکستانی لشکر ءَ جنگ ءَ نمیران بوتگ۔

گل ءَ یک بیانے شنگ کتگ کہ شال ءُ ایندگہ دمگاں سرمچاراں وتی جاہ برجاہ داشتگ انت ءُ اے وئیلاں 150 ءَ چہ گیش پاکستانی فوجی، پولیس ءُ اے دگہ کارندہ مرتگ انت۔

ویڈیو کلوہ ءِ تہ ءَ زالبولیں باسک ءَ بلوچ زالبولاں گوں دزبندی کتگ کہ آ بلوچستان ءَ برجاھیں سلاھبندیں جُھد ءَ ھوار بہ بنت، وھدیکہ زالبولیں باسک ءَ ھم جنگ ءَ پیش دارگ بوتگ۔

وتی کلوہ ءِ تہ ءَ حوا بلوچ ءِ گشگ انت کہ پاکستانی ریاست ءَ بلوچ زالبولانی وڑ ءَ بلوچ مردینانی وڑ ءَ زلم ھم کتگ۔ نوں وھد اِنت کہ بلوچ زالبول پاد بیا اَنت ءُ وتی سر ءَ بوتگیں زلم ءُ زوراکیانی بدل ءَ بہ زور اَنت ءُ ریاست ءَ کلوہ بہ دے اَنت کہ بلوچ زالبول زانشت ءُ زانت ءَ نیزور نہ انت-