بلوچستان ءَ جاور ناگیگ، چہ پنجاب ءَ بلوچستان ءَ رؤکیں سرجمیں راہ بند

بلوچستان ءَ آپریشن ھیروف ءِ دومی بھرگ ءِ سوب ءَ سیکیورٹی ءِ جاورھالاں چہ ڈیرہ غازی خان ءَ پنجاب ءَ بلوچستان ءَ رؤکیں سرجمیں راہ بند کنگ بیتگ اَنت-

ڈپٹی کمشنر ڈیرہ غازی خان ءِ رِد ءَ بلوچستان ءَ رؤکیں شھدگ فورٹ منرو ءُ تونسہ – موسیٰ خیل دگ بند کتگ، وھدے کہ تنی وھدے مساپر ڈی جی خان ءِ راہ ءَ بلوچستان ءَ شُت نہ کن اَنت-

ڈی سی ڈیرہ غازی خان ءِ پرمان ءَ پد بلوچستان ءَ چہ ھمگرنچیں سیمسری دمگاں بواٹہ ءُ سخی سرور ءِ ھندانی سر ءَ گاڑیانی روگ ءَ دارگ بیتگ اَنت-

دومی نیمگ ءَ شال ءَ چہ تھی ڈیھ ءُ چمن ءِ واستا ریل سروس مروچی دومی روچ ءَ ھم بند کنگ بیتگ- پشاور ءِ واستا جعفر ایکسپریس ءُ چمن ءِ واستا مساپر ریل نہ شتگ اَنت-

زانگ بہ بیت کہ بلوچ لبریشن آرمی ءَ گوستگیں روچ ءَ سرجمیں بلوچستان ءَ وتی “آپریشن ھیروف 2 ” بندات کنگ ءِ جار جتگ، چریشی ءَ پد بلوچستان ءِ جتاجتائیں دمگاں کاروائی ءُ میڑانی ھال سر بیگ ءَ اَنت-