بی وائی سی ءَ زورانسری بیگواھیں مردمانی کیسانی درج کنگ ءِ دزبندی کتگ

بلوچ یکجھتی کمیٹی ءِ بنجاھی رھشون سمی دین بلوچ ءَ یک ویڈیو بیانے ءِ تہ ءَ گشتگ کہ ریاست ءَ بلوچستان ءَ زورانسری بیگواہ کنگ، درکانودی کوش ءُ لٹ شاپ کتگیں لاشانی چگل دیگ یک زوریں پالیسی ءِ سر ءَ امل بیگ ءَ انت۔ اے ناگیگی روچ پہ روچ گیش بوگ ءَ اِنت۔ نوں اے زلم ءُ زوراکی ایوک ءَ مردینانی تَک ءَ نہ انت بلکیں جنین آدم ھم زورانسری آوار جنگ ءُ زنداناں دارگ بوگ ءَ اَنت۔ پاکستانی ریاست بلوچ راج ءِ نشانگ جوڑ کنگ ءَ ھچ رنگیں دَر پشت گیجگ ءَ نہ انت-

آئی ءَ گوشتگ کہ اے درگت ءَ زورانسری بیگواہ کنگ یا درکانودی ءَ کشگ ءِ ھرچ وئیل ءِ سجوئیں دزنویشت جوڑ کنگ سک باز المی اِنت ھاسیں رنگ ءَ ھما کیس کہ انگت ءَ ھچ سرکاری یا درسرکاری ادارگ ءَ درج نہ بوتگ اَنت۔ اے سانمندیں کھولانی زمہ واری اِنت کہ اے کیسانی رجسٹریشن ءَ دلستکی بہ کن اَنت۔

ویڈیو بیان ءِ تہ ءَ گوشگ بوتگ کہ اے وھد ءَ (بلوچ یکجھتی کمیٹی) اے سرپدیانی سر ءَ کار کنگ ءَ انت ۔ ما چہ درستیں مردماں دزبندی کنیں کہ آ وتی کیساں چہ بی وائی سی ءَ رجسٹر بہ کن اَنت: سوشل میڈیا اکاؤنٹس، ای میل ءُ بی وائی سی ءِ انسانی ھکانی نمائندگاں سر بہ کن انت۔

ما چہ شما گیشتر دزبندی کنیں کہ اے کیساں زوتاں چہ زوت دیم بہ دئے اِت۔ مئے زانشت ءِ رد ءَ وھدے کہ کیسے رجسٹرڈ نہ بیت یا ھچ وڑیں رسمی ریکارڈ ءِ بھر نہ بیت ءُ پد ءَ آ مردم کُشگ ءُ لاش ءِ رنگ ءَ ایر کنگ بیت گڑا آماچیں ھاندان ءُ گل ءِ گور ءَ ھما ھژدری سبوت نیست کہ آ اے گپ ءَ سابت بہ کنت کہ آ مردم زورانسری ءَ بیگواہ کنگ بوتگ۔ کیس رجسٹریشن مئے گپ ءَ دیم ءَ سر کت کنت-

آئی ءَ گْوشتگ کہ وھدے ما گوں میان اُستمانی برادری ءَ بلوچ نسل کشی ءِ بابت ءَ گپ ءُ تران کن ایں کہ ایشی ءِ تہ ءَ آزار ءُ درد، زورانسری ءَ بیگواہ کنگ ءُ نپسیاتی ٹارچر ھوار اَنت گڑا مئے واستا المی اِنت کہ ما ھر یک مردمے ءِ کسہ ءُ ھر کیس ءِ سرجمیں ریکارڈے بہ بیت۔ میان اُستمانی تَک ءَ اے جوانیں توار ھما وھد ءَ ممکن اِنت کہ شما مئے گوما ھمکاری بہ کن اِت ءُ لوٹوکیں ھال ءُ اھوالداری ءِ دیم ءَ آرگ ءَ کیس ءَ رجسٹر بہ کن اِت۔

گڈسر ءَ آئی ءَ گْوشتگ کہ وتی دوستیں مردمانی ساہ ءَ سرانی رکھینگ ءِ ھاترا زوت کیس نبشتہ بہ کن اِت۔