بلوچ یکجھتی کمیٹی ءَ رسانکدر ءَ شنگ کتگیں درشان ءِ تہ ءَ گوشتگ کہ محمد عصا ءِ چاردہ سالی ئیں چُک ءُ نودربر راھی عصا ریاستی چیردستی ءَ کار کنوکیں ڈیتھ اسکواڈ ءَ تیرانی نشانگ کتگ ءُ کُشتگ-
دمگی اِھوالکار ءِ رِد ءَ راھی عصا ھوشاپ، کیچ ءِ بُنجاھی بازار ءَ نشانگ کنگ بیتگ- چمّگندانی گوشگ اِنت کہ ملٹری انٹیلیجنس ءَ چہ ھمگرنچ یک ڈیتھ اسکواڈ ءِ سلاہ بندیں مردمے ءَ کسان سالی ئیں گونڈوے ءِ سر ءَ تیرگواری کتگ، چریشی ءِ آسر ءَ آ جاہ پہ جاھی بیران بیتگ- اُرشکار کار ءَ پد زوت تتکگ اَنت-
بی وائی سی ءَ گوشتگ کہ راھی عصا یک نودربرے بیتگ، ءُ میان اُستمانی کانود ءِ رِد ءَ چُکاں پھاز ھست ءُ آیاں ھچ وڑیں لَٹ ءُ کُٹ ءِ نشانگ کُت نہ کن ئے، بلے اے ریاست ءَ ھچ کس ھم پھریز نہ اِنت- یک چُکے درکانودی کوش بُنیادی انسانی ھکانی ءُ میان اُستمانی کانود ءِ سنگینے ھلاپ ورزی اِنت، کہ کنونشن ءِ پہ چُکانی ھک ھم ھوار اِنت، کہ چُکانی ھک زند، پھاز ءُ سلامتی ءِ مانزمانی اِنت-
دیمتر ءَ گوشتگ کہ اے وئیل ءَ پد دمگ ءَ سک تُرس ءُ بیم ودی بیتگ- دمگی جھمنندانی رِد ءَ اے کوش بلوچستان ءَ برجاہ اے دْرچ ءِ پیشدار اِیت کہ اود ءَ ریاست سروکی ءَ سلاہ بندیں ٹولی بے لگامی ءَ کار ءَ اَنت- میان استمانی انسانی ھکانی گلاں لوٹ اِیت کہ آ اے وئیل ءِ زوت، پلگاری ءَ پٹ ءُ پول ءِ لوٹ ءَ بہ کن اَنت، زمہ واراں نشان ءُ آیانی ھلاپ ءَ کانودی کاروائی دلجمی بدنت، ءُ بلوچستان ءَ ڈیتھ اسکواڈ ءِ کاروائیاں ھلاس کنگ ھاتر ءَ زور بدے اَنت-