ایران ءَ گوستگیں بازیں روچاں زھرشانیانی درچ ترندی ءَ برجاہ انت کہ اود ءَ اے وھد ءَ ھزارانی ھساب ءَ مھلوک روڈانی سر ءَ سرکپتگ ءُ ایران ءِ ھستیں سرکار خامنہ ای ءِ درکنگ ءِ لوٹ ءَ کنگ ءَ انت –
اے زھرشانی بنداتی ءَ گرانھادی ءِ سر ءَ ات بلے سبک سبک ءَ اے مٹ بوان بوت ءُ ھستیں سرکار ءِ ھلاسی ءِ جار ءَ جنگ ءَ انت کہ اے ڈیھ ءِ سرجمیں پھناتاں سر بیتگ –
نامداریں ھالرسانی تندجاہ بی بی سی ءِ رد ءَ ایران ءَ زھرشانی برجاہ اِنت ءُ ایران ءِ واکداراں زھرشانی کنوکاں یک رندے پد ءَ بیھار داتگ انت۔ دو جتا جتائیں نادراھجاھانی ڈاکٹر ءُ کارندھاں بی بی سی ءَ گوں تران کنان ءَ گْوشتگ کہ ٹپیگانی مزنیں کساس ءِ سبب ءَ آیانی نادراہجاہ ءَ آسراتی سکیں جیڑھانی آماچ اَنت۔
یک ڈاکٹرے ءَ گْوشتگ کہ تھران ءِ یک چمی نادراھجاھے ءَ کرائسس موڈ ءَ روگی اِنت ءُ بی بی سی ءَ دگہ نادراھجاھے ءِ کارمندے ءِ نیمگ ءَ چہ ھم کلوہ رس اتگ کہ نادراھانی کساس ءِ دیمپانی ءَ سرجنانی سکیں کمی اِنت۔
دو انسانی ھکانی گلاں ٹاہ داتگ کہ تاں انوگ ءَ زھرشانی ءِ تہ ءَ کم چہ کم 50 زھرشانی کنوک بیران بوتگ اَنت۔
پنچ شمبے ءِ شپ ءَ چہ ایران ءَ کساس سرجمیں انٹرنیٹ بند کنگ بوتگ کہ ایشی ءَ چہ زانتکاری ءِ گرگ ءُ پٹ ءُ پول کنگ سک گران اِنت۔
یک ایرانی ڈاکٹرے ءَ کہ آدینگ ءِ شپ ءَ اسٹار لنک سیٹلائٹ انٹرنیٹ ءِ وسیلگ ءَ بی بی سی ءَ گوں رھوت کتگ آئی ءَ گشتگ کہ تھران ءِ مستریں چم ءِ نادراھجاہ فرابی ءَ ایمرجنسی ءِ جار جنگ بوتگ ءُ ایمرجنسی سروسز سکیں زور ءِ آماچ انت۔
آئی ءَ گوشت کہ در آرگی ءُ سرجری مھتل کنگ بوتگ انت ءُ اژدری جاوراں گوں گر ءُ چیل بوھگ ءِ واستا گیشیں کارندھانی گوانک جنگ بوتگ انت۔
بی بی سی ءَ پنچ شمبے ءِ روچ ءَ شیراز ءِ زرباری گوریچانی شھر ءِ یک نادراھجاھے ءَ کار کنوکیں کارندھے ءِ نیمگ ءَ چہ ویڈیو ءُ آڈیو کلوہ ھم رس اتگ۔ مرد ءِ گشگ ءِ رد ءَ مزنیں کساسے ءَ ٹپیگیں مردم نادراھجاہ ءَ آرگ بوگ ءَ اَنت ءُ نادراھانی آیگ ءَ گوں دیم پہ دیم بوگ ءِ واستا سرجن ھما کساس ءَ نہ بوتگ اَنت۔ مرد ءَ گوشتگ کہ بازیں ٹپیانی سر ءُ چماں تیر ءِ ٹپ بوتگ انت۔
امریکی گل انسانی حھکانی جھدکار نیوز ایجنسی ءَ ٹاپار جتگ کہ 28 دسمبر ءَ چہ زھرشانی ءِ بندات ءَ کم چہ کم 50 زھرشانی کنوک ءُ 15 سیکورٹی کارندہ بیران بوتگ اَنت ءُ 2311 ءَ چہ گیش مردم دزگیر کنگ بوتگ اَنت۔