بلوچستان ءُ آئی ءِ کش ءُ گوری دمگاں زورانسری بیگواھی ءِ درچ برجاہ اَنت کہ اود ءَ گیشتر بلوچ ورنا پاکستانی لشکر ءَ چہ جتا جتائیں جاھاں زورانسری ءَ دزگیر ءُ بیگواہ کتگ اَنت۔
گْوستگیں ھپتگانی تہ ءَ کم چہ کم دگہ 8 بلوچانی زورانسری بیگواھی ءِ کیس دیم ءَ اتکگ اَنت۔
ھالانی رد ءَ 8 جنوری ءَ پاکستانی لشکر ءَ عبداللہ ء اقبال چہ زِلہ کیچ تھسیل مند ، دزگیر کتگ ءُ ناشناسیں جاھے ءَ برتگ ۔
ھمے رنگ ءَ 29 دسمبر 2025 ءَ کراچی ءِ دمگ چہ گولیمار ءَ سی ٹی ڈی ءِ کارندھاں سھب ءِ 10 ءَ 24 سالی ئیں نودربر حمدان ء محمد علی دزگیر کتگ۔
ھمے وڑ 2 نومبر 2025 ءَ پنجاب ءِ شھر ڈیرہ غازی خان ءِ چہ بھٹا کالونی ءِ دمگ ءَ ایم آئی ءُ سی ٹی ڈی ءِ کارندھاں سئے بلوچ ورنا داؤد بلوچ، عثمان بلوچ، ءُ حکیم مجید بلوچ دزگیر ءُ بیگواہ کتگ اَنت۔
ھمے رنگ ءَ 20 نومبر 2025 ءَ شال ءِ چہ لک پاس ءِ دمگ ءَ پاکستانی لشکر ءَ 29 سالی ئیں نیکراھی استاد زبیر ء مراد خان دزگیر کتگ۔
ھمے وڑ 26 دسمبر 2025 ءَ 28 سالی ئیں مزدور محمد اقبال مرری ضلع بارکھان رکھنی ءَ چہ سیشن کورٹ ءِ دیم ءَ ملٹری انٹیلی جنس ءِ کارندھاں آوار جتگ۔
ایشی ءَ ابید 11 دسمبر 2025 ءَ 21 سالی پسدار سعید احمد ء محمد اکبر ایف سی ءُ سی ٹی ڈی ءِ کارندھاں چہ زِلہ مستونگ ءَ آئی ءِ لوگ ءَ دزگیر کتگ ءُ ناشناسیں جاھے ءَ برتگ۔
دی بلوچستان پوسٹ ءَ رس اتگیں دگہ ھالے ءِ رد ءَ 2 جنوری 2025 ءَ شپ ءِ چار ءُ نیم ءَ سی ٹی ڈی ءُ ایم آئی ءِ کارندھاں چہ گوادر ءَ 17 سالی ئیں ایف ایس سی جمال مراد ء مراد جان دزگیری ءَ پد بیگواہ کتگ۔
بلوچستان ءَ زورانسری بیگواھی ءِ ھلاپ ءَ کار کنوکیں گل ءُ انسانی ھکانی جھدکاراں اے وئیلانی سر ءَ مزنیں دلپدردی درشان کتگ ءُ گْوشتگ کہ بلوچ ورنایانی بیگواہ کنگ ھچ وڑیں کانودی جواز، وارنٹ ءُ آمیدگس ءَ پیش کنگ انسانی ھکانی کانودانی پدریں لگتمالی انت۔
زانگ بہ بیت کہ بلوچستان ءَ روچ پہ روچ زورانسری بیگواھی ءِ کیس دیم ءَ آرگ بیگ ءَ اَنت بلے لھتے سیاد ءُ وارس چہ ریاستی ادارگ ءُ تاکتانی ترس ءَ وتی نزیکیں مردمانی زور ءَ بیگواھی ءِ کیساں وھد ءِ سر ءَ ھال نہ کن اَنت۔
سیاد ءُ وارس گْوش اَنت کہ آیاں بے تواری ءِ دھمکی دیگ بیت بلے چہ بے تواری ءَ پد ھم ریاستی ادارگ بیگواھیں مردماں دیم ءَ نہ آرگ ءَ اَنت۔