بلوچ یکجھتی کمیٹی ( بی وائی سی ) ءِ رھشون ڈاکٹر ماہ رنگ بلوچ ءِ گھار نادیہ بلوچ ءِ گوشگ انت کہ ریاست ایمنیں بلوچ سیاسی رھشونانی بگیری ءَ کانود ءَ سلاہ ءِ پیم ءَ کارمرز کنگ ءَ انت ءُ آئی ءِ گھار ءَ ھوار بی وائی سی ءِ ایندگہ رھشوناں دہ ماہ سرجم انت کہ درکانودی بندیگ انت ۔
نادیہ بلوچ ءِ رد ءَ اے میان ءَ چہ بلوچستان بگر تاں اسلام آباد ءَ ڈاکٹر ماھرنگ بلوچ ءُ آئی ءِ سنگتانی یل کنائینگ ءِ ھاتر ءَ ایمنیں زھرشانی ، نندانک ءُ سیاسی زرمبشت چلائینگ بوتگ وھدیکہ اے جیڑوے آمیدگساں ھم پیشی بوگ ءَ انت. آئی ءِ گوشگ ات کہ بی وائی سی ءِ رھشونانی سرا جنگ بوتگیں بھتام وتگڑیں ، دروگ ءُ بدنیتی ءِ سرا انت ءُ ریاست مھلوک ءِ بی وائی سی ءَ منگ ءُ آئی ءِ سیاسی چست ءُ ایراں ترسگ ءَ انت ءُ آ بندیگ کتگ انت ۔
نادیہ بلوچ ءِ رد ءَ ھمے زوتاں بازیں آمیدگساں بی وائی سی ءِ رھشون بازیں ارزیاں زمانت بوتگ انت ۔ آئی ءَ گوشتگ کہ شال ءَ شش ارزیانی زمانت منگ بوتگ ، کہ آیانی تہ ءَ چار سٹی سیشن کورٹ ءُ دو سریاب ڈویژن آمیدگس ءَ داتگ انت ۔ ھمے وڈ مستونگ ءَ نبشتہ بوتگیں دو ارزی جوڈیشل مجسٹریٹ امیدگس ءَ ھم زمانت من اتگ انت ۔
آئی ءَ گوشتگ کہ کاؤنٹر ٹررازم ڈیپارٹمنٹ سی ٹی ڈی ءَ کلات ءَ ڈاکٹر ماھرنگ ، شاھجی ، بیبو ءُ گلزادی ءُ بیبرگ ءِ بگیری ءَ چار ارزی نبشتہ کنگ بوتگ بلے پدا ھم اینٹی ٹیررازم کورٹ کلات ءَاے ارزیاں درست زمانت ءِ سرا یل کتگ انت ۔ نادیہ بلوچ ءِ رد ءَ آمیدگسانی اے پیسلہ اے گپ ءِ گواھی ءَ دئینت کہ اے وتگڑیں ءُ بے بنیادیں ارزی بوتگ انت ۔
آئی ءَ گوشتگ کہ بس یک ھپتگے ءَ ڈاکٹر ماھرنگ ءُ آئی ءِ سنگت دوازدہ جتا جتائیں ارزیاں زمانت بوتگئےانت ۔ اے درسیں ارزی جنوری ءُ پروری 2025 ءَ دیگ بوتگ انت بکول ھمائی ءِ اے دراہ ریاستی شوربندی ءِ پیشدارگ انت ۔
نادیہ بلوچ ءِ گوشگ انت کہ یکیں وئیل ءَ بازیں ارزی نبشتہ کنگ وت درکانودی کار ئے کہ آئی ءِمول ھمیش انت سیاسی باسکاں دراجیں ءُ ھلاس نہ بؤکیں کانودی جنگ ءِ تہ ءَ پنسارینگ انت ۔ آئی ءَ ھمے درور داتگ ءُ گوشتگ کہ جنوری 2025 ءَ دلبندین ءِ مچی ءِ بگیری ءَ بازیں دمگاں ارزی نبشتہ کنگ بوتگ بلے اے دراہ یکیں سیاسی چست ءُ ایر بوتگ انت ۔
آئی ءَ گوشتگ کہ اے وت پاکستان ءِ کانود ءِ شک 13 بگیرداری ئے کہ یکیں الزام ءَ پد ماں پد ارزی کنگ ۔ نادیہ بلوچ ءَ گوشتگ کہ ریاست اے واست ءَ ھما مردم ءَ آمیدگس ءَ نیار ایت پرچاکہ آ آمیدگس ءِ پیسلہ ءِ سرا باور نہ کنت ۔
آئی ءَ کلات ءِ یک ارزی ءِ درگت ءَ گوشتگ کہ سی ٹی ڈی ءَ ڈاکٹر ماھرنگ ءُ ایندگہ رھشونانی سرا وتکش تراک ءِ بھتام جتگ کہ وتگڑ ءُ بدنیتی ئے ۔ آئی ءَ گوشتگ ھمے میان ءَ بازیں دگہ ناشریں وئیلانی کتکاراں دزگیر کنگ ءِ بدل ءَ بی وائی سی ءِ ایمنیں سیاسی رھشون نشانگ کتگ انت ۔ بلے پدا ھم اے ارزی ھم سیشن کورٹ ءَ زمانت منزور کتگ ۔
نادیہ بلوچ ءَ گوشتگ کہ بلوچستان ءَ سیاسی جھد جرمے کنگ بوتگ ءُ ایمنیں سیاسی رھشونانی سرا ناشرکاری نام دیگ بوگ انت ۔ بکول ھمائی ءِ اے اختلاف رایہ ءُ سیاسی مچی ءَ کتکار جوڈ کنگے پالیسی ئے ۔
درشان ءِ گڈسر ءَ نادیہ بلوچ ءَ گوشتگ کہ اے درسیں ارزی اے گپ ءِ گواھی ءَ دئینت کہ ریاست ایمنیں گھگیری ءَ ترس ایت ۔ آئی ءَ گوشتگ وھدیکہ اے توارطپہ تاکت ءِ زور ءَ ھاموش کنگ نہ بوتگ گڈا کانود کارمرز کتگ ، بلے پدا ھم گوستانک گواہ انت کہ زوراکی ھاتر ءَ کارمرز بؤکیں کانود وت زوراک ءَ پدر کنت ۔