کیچ : زالبولانی بیگواھی ءِ ھلاپ ءَ یکرندے پد ءَ زھرشانی برجاہ

کیچ ءَ بیگواھی زالبولانی آوار جنی ءِ ھلاپ ءَ یکرندے پد ءَ زھرشانی برجاہ-

کیچ ءِ دمگ کرکی تجابان ءِ ھند سر ءَ یکیں کھول ءِ سے مردم آیانی تہ ءَ دو زالبول ھوار اَنت، زورانسری آوار جنی ءِ ھلاپ ءَ زھرشانی سی پیک شھدگ بند کتگ، چریشی ءِ سوب ءَ دمگ ءَ گاڑیانی روگ آیگ سرجمی ءَ بند-

دمگی اِھوالکار ءِ رِد ءَ مروچی زالبولانی سروکی ءَ چہ بؤکیں اے زھرشانی ءِ آسر ءَ تربت ءَ شال، پنجگور، آواران، کولواہ ءُ ھوشاپ ءَ چہ ھمگرنچ بیؤکیں بُنجاھی شھدگ ھرچ وڑیں گاڑیانی روگ آیگ ءِ واستا بند کتگ- دگ دوئیں نیمگاں گاڑیانی دراجیں لین لگ اِتگ-

زھرشانی کنوکیں کھولانی رِد ءَ اے سئیں مردم زورانسری بیگواہ کتگ اَنت – زورانسری آوار جنگ بیتگیں مردمانی تہ ءَ بیست ھپت سالی ئیں ھانی ء دلجان، ھپدہ سالی ئیں خیرالنساء ء عبدالواحد، ھژدہ سالی ئیں مجاھد ء دلجان ھوار اَنت-

کھول گوشگ اِنت کہ ھانی ء دل ھشت ماھی لاپ پُریں زالبولے، چریشی ءِ سبب ءَ زھرشانی کنوک ءُ دمگ ءَ تُرس ودی بیت-

زھرشانی کنوکاں لوٹ کتگ کہ بیگواھیں مردماں زوت آمیدگس ءَ پیش بہ کن اِت- زالبول زھرشانی کنوکانی گوشگ اِنت کہ آ بازیں روچاں چہ زھرشانی کنگ ءَ اَنت- بلے تنی وھدے واکدار ءِ نیمگ ءَ چہ ھچ وڑیں شریں گامگیج زیرگ بیگ ءَ نہ اِنت-

زھرشانی کنوکانی گوشگ اِنت کہ مارا لاچار اَنت دگ بند کنگ کپتگ مئے کر ءَ توار چست کنگ ءِ یکیں راہ ھمش اِنت- اگاں مئے دوستناک بے میار اَنت گُڑا آیاں آمیدگس ءَ پیش بہ کن اِت-

اے اولی رند نہ اِنت کہ اے کھول ءِ مردماں زھرشانی کتگ- پنچ روچ ءَ ساری ھم کرکی تجابان ءَ نندانک داتگ، کہ دمگی انتزامیہ ءِ گوم ءَ گپ دیوان ءَ پد مھتل داشتگ- بلے کھول ءِ گوشگ اِنت کہ کولاں اَبید بیگواھیں مردمانی درگت ءَ ھچ وڑیں گامگیج زیرگ نہ بیتگ آیاں دوبر زھرشانی کنگ کپتگ-

بلوچستان ءَ زورانسری آوار جنی ءِ جیڑہ یک دراجیں مدتے بیت ھست اِنت، ءُ انسانی ھکانی گلاں باز رند ءَ اے درگت ءَ دلپدردی درشان اِتگ-

سی پیک شھدگ ءِ بندی ءِ سوب ناں تھنا دمگی آبادی بلکیں ڈنی سپر کنوکیں مساپر ھم سک اسرمند بیگ ءَ اَنت- وھدے کہ زھرشانی کنوکانی گوشگ اِنت دانکہ لوٹ منّگ نہ بیت اَنت زھرشانی برجاہ بنت-