بلوچستان ءِ جتاجتائیں دمگاں بیتگیں اُرشانی زمہ واری بی ایل اے ءُ بی ایل ایف ءَ منّ اِتگ اَنت

بلوچستان ءَ پاکستانی پوج، ٹاور، سیندک ءِ پُلپانچیں منسوبہ ءِ مڈیانی بروک گاڑیانی سر ءَ بیتگیں اُرشانی زمہ واری بی ایل اے ءُ بی ایل ایف ءَ منّ اِتگ اَنت-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گوشتگ کہ مئے سرمچاراں بیست سے دسمبر ءَ کیچ ءِ دمگ تجابان ءَ زورگریں پاکستانی پوج ءِ یک پوسٹے اُرش ءِ نشانگ کتگ، سرمچاراں وتکاریں سلاہ کارمرز کتگ ءُ گرنیڈ لانچر ءَ چہ زورگریں پوج ءِ سنگرانی سر ءَ بازیں گولھے آس داتگ- اُرش ءِ میان ءَ زورگریں پوج ءِ دو کارمند جاہ پہ جاھی مرتگ اَنت ءُ آئی ءَ گیش تاوان ءِ دیمپانی کنگ کپتگ- سرمچاراں بُنجل ءَ پٹّیں سرویلنس کیمرہ ھم تباہ کتگ اَنت-

جارکش ءَ دیمتر ءَ گوشتگ کہ مئے سرمچاراں بیست پنچ دسمبر ءَ پنجگور ءِ دمگ کاٹگری ءَ سی پیک دگ سر ءَ زورگریں پاکستانی پوج ءِ یک گاڑی یے ھما وھد ءَ ریموٹ کنٹرول آئی ای ڈی اُرش ءِ نشانگ کتگ وھدے آ جتاجتائیں ھنداں چہ وتی کارندھاں پھاز دیگ ءَ پد واتر برگ ءَ بیتگ اَنت، تراک ءِ آسر ءَ زورگریں پوج ءِ شش کارندہ مرتگ ءُ دگہ چار ٹپی بیتگ اَنت وھدے آیانی گاڑی ءَ سک تاوان رس اِتگ-

جارکش ءَ گوشتگ بلوچ لبریشن آرمی ءِ سرمچاراں مروچی تربت ءِ دمگ ڈنک ءَ زورگریں پاکستانی پوج ءِ کارمرزی ءَ ھال اھوالی ٹاور تراکناکیں شورو پٹ کتگ ءُ تباہ کتگ ءُ اشی ءِ سر ءَ پٹّیں چاریگی کیمرہ ھم نشانگ کتگ ءُ کار ءَ بیتگ-

ھمے وڑ بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں بیست ھپت دسمبر ء روچ یازدہ ءَ سوراب ءِ دمگ بتگو کراس ھند سر ءَ آر سی ڈی شھدگ سر ءَ ناکہ بندی ءُ پٹ ءُ پول کتگ-اے میان ءَ سیندک پُلپانچیں منسوبہ چہ لُٹ ءُ پُل کنوکیں مڈی بروکیں گاڑی ءُ آیانی پھازوکی ءَ پوج ءِ چار گاڑی اود ءَ اتکگ اَنت کہ سرمچاراں ھمے یکیں وھد ءَ نشانگ کتگ اَنت چریشی ءِ آسر ءَ پوج ءِ یک گاڑی یے شریں وڑے ءَ نشانگ ءِ تہ ءَ اتکگ ءُ آئی ءَ سوار پنچ کارمند مرتگ ءُ بازین ئِے ٹپی بیتگ اَنت وھدے کہ کاروان ءَ ھوار لشکر ءُ پُلپنانچیں منسوبہ ءَ چہ ھمگرنچ آ دگہ گاڑیاں ھم سک تاوان رس اِتگ-

جارکش ءَ گوشتگ بلوچستان لبریشن فرنٹ سوراب ءَ ناکہ بندی، پاکستانی لشکر ءِ سر ءَ اُرش ءَ پنچ کارمندانی کوش ءُ پُلپانچیں سیندک منسوبہ ءِ گاڑیانی سک تاوان دیگ زمہ واری ءَ منّ ایں-

درشانانی گُڈی ءَ دوئیں گلاں اُرشانی زمہ واری منّ اِتگ گوشتگ کہ مئے اُرشانی درچ داں بلوچستان ءِ وتواجھی ءَ تاں برجاہ بنت-