بلوچستان ءِ جتا جتائیں جاھاں کمپنی، پوج ءُ مڈی بروکیں گاڑیانی سر ءَ اُرش

بلوچستان ءِ جتا جتائیں جاہ کولواہ، سوراب ءُ تربت ءَ سلاہ بندیں مردماں پاکستانی پوج، مڈی بروکیں گاڑی ءُ دگ جوڑ کنوکیں کمپنی نشانگ کتگ انت-

گیشیں ھالانی رد ءَ کیچ ءِ دمگ کولواہ ءَ ناشناسیں سلاہ بندیں مردماں بند ساچی شرکت ءِ سر ءَ اُرش کتگ ءُ گاڑی مانداشتگ انت۔

بنشون ءِ رد ءَ اے ویل گوستگیں شپ ءَ ھوشاپ ءَ بوتگ کہ پرپٹ سواریں سلاہ بندیں مردماں دو ڈمپر ءُ یک ایکسکیویٹرے مانداشتگ انت کہ گاڑی سرجم ءَ ستکگ ءُ تباہ بوتگ اَنت۔ انگت ءَ دگہ تاوانانی بارو ءَ اھوال دیم ءَ نیتکگ انت-

ھمے وڑ ءَ گوستگیں شپ ءَ سوراب ءَ سلاہ بندیں مردماں دگ بستگ ءُ پٹ ءُ پول کتگ انت-

اے ویل سوراب ءِ ھند رودینجو ءِ میان ءَ بیتگ کہ اود ءَ سیندک ءَ روکیں گاڑیانی واستا پھزداری کنوکیں پوج ءُ سلاہ بندانی میان ءَ داں دیر ءَ جنگ ءُ چوپ بیتگ انت-

ھمے وڑ ءَ کیچ ءِ بنجاھی شھر تربت ءَ سلاہ بندیں مردماں پاکستانی نیوی ءِ بنجل ءِ سر ءَ اُرش کتگ بیتگ-

تنی وھدی اے اُرشانی زمہ واری ھچ گل ءَ نہ زرتگ انت-