پیر مرد ءِ سپر – زھیر بلوچ

نبشتانک: پیر مرد ءِ سپر

نبشتہ کار: زھیر بلوچ

دی بلوچستان پوسٹ

ھما انت ماما کدیر ءِ بیرانی ءِ ھال اِشکتگ من سک دلپدرداں منی چمانی دیم ءَ یکشلہ ماما کدیر ءِ اکس زاھر اِنت ماما کدیر بلوچ گُلزمین ءِ انچیں کارستے کہ آئی ءِ سر ءَ ھمینچو نبشتہ بکن اِت انگت کم اِنت، چی ءَ کہ ماما ءَ پیرانسالی نادُراھی ءَ ابید ھم وتئی راج یل نہ داتگ وتی راج ءِ درد ءَ چے بے ترانگ نہ بوتگ۔

ماما کدیر ءِ توکل ءُ جوزگ پیرانسری ھم مھکم اِت اَنت، زوراکیں استان ءَ وتی سرجمیں زور جت اَنت کہ اے پیر مرد ءَ پروش بہ دنت ءُ بے توار بہ کنت بلے ماما یکشلہ جُنزگ ءَ اَت، ماما ءَ دم برگ ءُ تُرس ءِ نام نہ زانت۔

من اے دمان ءَ جیڑگ ءَ آ کہ انوں شال سک سرد بیت باریں ماما اے سال ءَ وتی زور بیگواھیں مردمانی بُنجُل ءَ کراچی ءَ بارت اگاں ناں۔۔۔۔ بلے نوں اے جیڑگ بس جیڑگے پشت کپتگ چی ءَ کہ ماما ءَ مارا بالادی دروشُم ءَ یل دات ءُ وتی ابدی جاہ ءَ شُت۔

شال ءِ برپیں بالاد ءِ سر ءَ ھمُک روچ بچار پیر مردیں ماما ءَ شالے مانپوش اِتگ ءُ سارتی ءِ سر ءَ زورانسری بیگواھیں بلوچ پُسگانی اکساں گوں بُنجل ءَ نشتگ۔

برے ایوک ءُ تھنا اِنت برے زورانسری آوارجتگیں مردمانی کھولاں گوں نشتگ، اے کھول بلوچستان ءِ کُنڈ کُنڈ ءَ چے ھمے امُیت ءَ اے بُنجل ءَ اتکگ اَنت کہ بلکیں مئے توار گوشدارگ بیت مئے زورانسری بیگواھیں مھروان پہ سلامتی واتر بنت، ماما ھمے کھولانی توکل بوتگ ماما ھمے کھولانی ھمکوپگ بوتگ، ماما ءَ اے مات ءُ گھارانی، پیریں پتانی درد مار اِتگ ءُ پھم اِتگ چی ءَ کہ ماما وت اے زوراکیں استان ءِ زوراکیانی آماچ بوتگ۔

13 فروری 2009 ءَ ماما ءِ تاسپیں بچ شھید جلیل ریکی زورگریں استان ءِ لشکر ءَ آوارجنگ ءَ پد 22 نومبر 2011 ءَ شھید کُت ءُ آئی ءِ ژانگولیں لاش دور دات اے ندارگ پہ ھمُک پِت ءَ سک گران بیت کہ آئی ءِ زند ءَ ورنائیں بچ دردی شھید کنگ بہ بیت بلے ماما ءَ اے ساھگریں ندارگ ءَ ھم وتی راجی توکل مھکم داشتگ ءُ وت ءَ را اے باور کنائینتگ کہ ما زیردست اِیں ءُ اے استان مئے سر ءَ زورگر اِنت پمیشکا مئے برات ءُ بچاں آوار جنگ ءُ بیگواہ کنگ ءَ اِنت آھانی ژانگولیں لاشاں دور دیگ ءَ اِنت۔

وتی ورنائیں بچ ءِ شھیدی ءَ پد ماما ءَ سرجمیں بلوچستان ءِ زورانسری بیگواھیں ورنا وتی بچ کُت اَنت ھمیشانی رکینگ ءَ پہ در کپت۔

27 اکتوبر 2013 ءَ ماما ءَ گوں زوربیگواھیں زاکر مجید ءِ گُھار پرزانہ مجید، ڈاکٹر دین مھمد ءِ چُک سمی بلوچ، رمزان بلوچ ءِ کسان سالیں چُک الی ھیدر ءُ ایدگہ کھولاں چہ شال ءَ دراجیں روانکے بندات کُت اے روانک ءِ میان ءَ زورگریں استان ءَ وتی سرجمیں زور کارمرز کُت کہ ماما ءَ بہ دار اِیت ءُ اے روانک ءَ ناسرجم بہ کنت بلے ماما ءَ اوشتگ ءِ نام نہ زانت ماما درکپت ءُ جُنزان بوت، کشک ءَ ماما ءِ کاروان ءِ سر ءَ اُرش کنگ بوت کھول پادتراپ دیگ بوت اَنت بلے ماما ءَ ھچ چک نہ جت ءُ روان بوت، اے دراجیں روانک شال ءَ چے کراچی ءُ پد ءَ 28 فروری 2014 ءَ اسلام آباد ءَ شُت سر بوت اے روانک بلوچ راج ءَ ھوار میان استمانی دنیا ءِ توک ءَ ھم تاریکی روانکے اَت اسلام آباد ءَ ماما ءَ جیوز نیوز ءِ مراگش کپیٹل ٹاک ءَ گوں ھامِد میر ءَ دیوان کُت ءُ بلوچستان ءِ راستیں دروشُم جاور درشان کُت اَنت۔

اے دراجیں روانک ءَ پد ھم ماما بے توار نہ بوت ماما ءَ شال ءَ زوربیگواھیں بلوچانی توار ءِ واستا بُنجلے بندات کُت کہ روچ ء مروچی برجاہ اِنت، اے بُنجُل ماما ءِ دومی لوگ بوتگ ماما وتی لوگ ءَ چے گیشتر اے بُنجُل ءَ گندگ بوتگ، اے بُنجُل سک باز بر ءَ زوراکیں استان ءِ داشتگیں دلار ءُ چیریں اداراھانی کارمنداں مانداشتگ ءُ پروشتگ برے زور بیگواھیں بلوچانی اکس درتگ اَنت ءُ ھیمہ دور داتگ بلے ماما ءَ ایدگہ روچ ءَ پد ءَ ھمے اکسانی درتگیں ٹُکُّر یکجاہ کتگ ءُ بُنجُل برجاہ داشتگ۔

ماما ءِ ھمے جھد ءِ برورد ءَ ھما کھول کہ آھانی مھروان زوربیگواہ کنگ بوتگ اَنت بلے آ بے توار بوتگ اَنت بلے رند ءَ کہ ایشاں ماما ءِ جھد دیست گُڑا اے سانمندیں کھولانی توک ءَ ھم آٹیگ اَتک ءُ ماما ءِ بُنجُل ءَ اَتک اَنت ءُ توار اِش چست کُت۔

ماما ءِ کردار سک مزن اِنت منی وڑیں نابودے ماما ءَ ھجبر درشان کُت نہ کنت، ماما ءِ بیرانی پہ سرجمیں بلوچ راج ءَ سک باز تورناک اِنت ماما ءِ کنڈ ھجبر پُر کنگ نہ بیت، ماما ءِ جاہ مدام ھورک بیت بلے ما اگاں ماما ءَ زندگ دارگ لوٹیں گُڑا مارا ماما ءِ کاروان ءَ ھوار بوگی اِنت ھما جھد کہ ماما ءِ بوتگ مارا ھمے جھد وتی کنگی اِنت ماما ءِ بُنجُل ھورک کنگی نہ اِنت ماما ءِ وڑ ءَ وتی زندانیگیں ءُ زوربیگواھیں براتانی واستا توار چست کنگی اِنت ماما کدیر ءِ کرد پہ بلوچ پدریچ ءَ گھگیری ءِ چیدگ اِنت ءُ ماما بلوچ راجدپتر ءَ داں ابد نمیران اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-