چہ شال ءَ زورانسری ءَ بیگواہ بوتگیں ورناہ ءِ یل دیگ ءِ ھاتر ءَ ایم 8 شھدگ یک رندے پد ءَ بند کنگ بوتگ، سانمندیں کھول ءِ زھرنانی نندانک برجاہ انت-
گیشیں ھالانی رد ءَ شھزاد ء منیر احمد جھمنند ھیرونک ، 5 نومبر 2025 ءَ چہ شال ءَ زورانسری بیگواہ کنگ بوتگ ، بازیں روچاں پد آئی ءِ بابت ءَ ھچ وڑیں ھال ءُ اھوال دیم ءَ نیتکگ ، کھول ءِ مردماں مرچی زھرشسنی کنان ءَ شھدگ بند کتگ ءُ نشتگ انت کہ چریشی ءِ سبب ءَ ایم 8 شھدگ ءَ روانی مھتل بیتگ –
زھرشانی کنوکیں مردمانی گْوشگ اِنت کہ ھمگرنچیں واکداراں نہ اے ورنا یل داتگ ءُ نہ آئی ءِ بیگواھی ءِ بابت ءَ ھال ءُ اھوال داتگ انت کہ ھمے سبب ءَ ما لاچار بوتگ ایں کہ راہ بند کنگ ءِ پیسلہ کتگ۔
کھول ءَ لوٹ کتگ کہ شھزاد زوت یل کنگ بہ بیت یا آئی ءِ بیگواھی ءِ بابت ءَ راستی لس مھلوک ءِ دیم ءَ آرگ بہ بنت۔
زانگ بہ بیت کہ ایشی ءَ چہ پیسر دو زالبولانی زوراکی ءَ بیگواہ کنگ ءِ ھلاپ ءَ سی پیک ءِ شھدگ ھم گوستگیں سئے روچاں بند کنگ بوتگ۔ پنچ شمبے ءِ روچ ءَ شپ ءَ ڈپٹی کمشنر کیچ بشیر احمد بڑیچ ءَ زالبولانی زوت یل دیگ ءِ دلجمی ءَ پد گپ ءُ تران سوبمند بوت کہ ایشی ءِ آسر ءَ زھرشانی ھلاس بوتگ-