بلوچ اسٹوڈنٹس ایکشن کمیٹی ءَ وتی شنگ کتگیں درشان ءَ گوشتگ نوکیں سال ءِ بندات ءَ بلوچستان ءِ جتاجتائیں ھند ءُ دمگاں “بلوچستان کتاب کاروان” ءِ نام ءَ کتاب میڑہ برجم دارگ بیت۔“گوں کتاباں نزینکی ءُ ھمگرنچی راجانی دیمروئی ءِ مستریں چیدگ انت”-
آئی ءَ گوشتگ میان اُستمانی دیمروئی ءُ استانانی تاکت ءِ مستریں وسیلگ زانت ءُ زانشت اِنت۔ زانت ءُ زانشت ءِ آیگ ءِ تیوکیں وسیلگ کتاب اَنت۔ ھمے راستی دگنیا ءَ مارِ اتگ ءُ ھمے ترز ءَ گام جنان ءَ مرچی دنیا دیمروئی ءِ راہ ءَ سپر کنان اِنت۔ دنیا ءِ کُلیں دیمروئی کتگیں ءُ وانندگیں راج ءُ استانانی روتگ گوں تاکتوریں علم ءُ زانت ءَ بندوک اَنت۔ اگاں مرچیگیں اھد ءِ توک ءَ راجے گوں دگنیا ءِ ھواری ءَ جُنزگ لوٹ ایت گڑا آ راج ءَ کُلاں گیش دلگوشی زانت ءُ زانشت ءُ وانگ ءَ دیگی اِنت۔ بلوچ ھمے دگنیا ءِ توک ءَ یک زندگیں راجے کہ ھزاراں سالی رسم ءُ دودانی واھند اِنت۔ بلے بلوچ ءِ بدبھتی ھمیش اِنت کہ بلوچ راج ھمک پڑ ءَ ایر دست ءُ پد منتگ کنگ بوتگ۔ آئی ءِ مستریں وسیلہ ایش انت کہ بلوچ راج چہ کتاباں دور دارگ بوتگ۔
ھمے درگت ءَ بلوچ اسٹوڈنٹس ایکشن کمیٹی یک نودربر گلے ءِ بستار ءَ ھمے سرپد بیت کہ راجانی دیمروئی ءِ مستریں وسیلگ زانت ءُ زانشت اِنت ءُ زانت ءُ زانشت ءِ تیوگیں وسیلگ کتاب اَنت۔ گل ھمک سال ءِ پیم ءَ اے سال ءَ ھم بلوچستان ءِ جتا جتائیں ھند ءُ دمگاں “بلوچستان کتاب کاروان” ءِ نام ءَ کتاب میڑہ برجم داریت۔ اے کتاب میڑہ بلوچستان ءِ توک ءَ وانگی پڑ ءَ گیشی ءَ ھوار زانت ءُ زانشت ءِ سر ءَ یک گھتری ءُ مٹی آرگ ءِ وسیلگ بوت کن اَنت۔ ما سرپد بہ ایں کہ یک نودربر گلے ءِ بستار ءَ ما بلوچ راجمان ءَ ھمک ھما امل ءَ بہ شوھازیں یاکہ دیم ءَ بیار ایں کہ آ مئے وانگ، الم، زانت ءُ زانشت ءَ گھتر ءُ شوکتر کرت کنت۔ اے درگت ءَ ھمک سیاسی، وانگی ءُ لبزانکی پروگراماں ھوار کتاب میڑہ گل ءِ مستریں پروگرامانی بھر اَنت کہ جتاجتائیں وھداں برجم دارگ بنت۔ بساک نوکیں سال ءِ بندات ءَ بلوچستان ءِ جتاجتائیں ھند ءُ دمگاں کتاب میڑہ برجم دار ایت۔ ما بلوچ راج، مھلوک ءُ ورنایاں چہ لوٹ کنیں کہ آ کتاب میڑھاں گیش ءَ گیش بھر بہ زیر اَنت کہ اود ءَ شُمارا دگنیا ءِ کُلیں لٹریچر بزانکہ لبزانک،گوستانک، سیاست ءُ شَیر ءُ شائری ءَ ھوار فلسفہ ءُ دنیا ءِ ایندگہ سرھالانی سر ءَ کتاب دست کپ اَنت۔