بلوچ اسٹوڈنٹس ایکشن کمیٹی ءَ وتی شنگ کتگیں درشان ءَ ماما کدیر بلوچ ءَ ستک شانی ندر کنان ءَ گوشتگ بلوچ ءِ گوستانک ءِ تہ ءَ مارا سک باز چشیں کارست ءُ سیاسی جُھدکارانی درور دست کپ اَنت کہ آھاں بلوچ جُھد ءِ ھاتر ءَ وتی گراں بھائیں کِرد پیلو کُتگ، ماما قدیر ھم چہ ھما کِرداراں یکے کہ آئی ءَ وتی سرجمیں زِند بلوچ راج، راجی جَنز ءُ مھلوک ءِ انسانی ھکانی پھازگ ءِ ھاتر ءَ ندر کُت ءُ داں زِند ءِ گُڈی وھد ءَ ھمے راہ ءَ سپر کنان ءَ نمیران بوت۔ ماما قدیر بلوچ ءِ چہ دنیا ءَ سپر کنگ پہ راج ءَ مزنیں تاوانے بلے دومی نیمگ ءَ آئی ءِ کِردار پہ راج ءَ پنتے۔ ما ھمت ءُ یکشلیں جھد ءِ چیدگ ماما کدیر بلوچ ءَ سِتک شانی ندر کن ایں۔
آئی ءَ گوشتگ ماما قدیر بلوچ ھما کِردار اَت کہ مُدام راج ءِ سکی ءُ سوریاں گوں آھاں یکجاہ اَت ءُ ھمک بلوچ ءِ درد ءَ ھوار اَت۔ ماما پہ گم جتیں زھگاں مھروانیں پتے ءُ پہ راج ءَ مُھکمیں کوپگی اَت کہ آئی ءَ مُدام راج ءِ سر ءَ بیوکیں زوراکیانی دیمپانی گوں تمردی ءَ کُت۔ ماما پہ بے اوستیں راج ءَ اُمیت ءِ ھما کندیل اَت کہ ھرچونیں نگیگیں جاوراں روک اَت ءُ لگتمالیں راج ءِ ھاتر ءَ راہ ءَ رُژنا کنان اَت۔ ماما قدیر بلوچ ءِ دراج مُدتیں جُھد مارا پہ درونتے ءُ مارا سگ ءُ اوپار ءِ ھمے سکین ءَ دنت کہ نگیگیں ءُ نا امیتیں جاورانی تہ ءَ چے پیم ءَ اوشتگی ایں ءُ پد کنز بیگی نہ ایں۔
آئی ءَ گوشتگ جُھدکار مُدام سیاسی سپر ءَ وتی املاں گوں وتی پداں نکش کن اَنت کہ آ داں ابد مان اَنت۔ ماما ءِ کرتگیں امل پہ سیاسی جُھدکاراں ھما درونت اَنت کہ آ مارا گھگیری ءِ درس ءَ دیے اَنت۔ گار ءُ بے گواھیں مردمانی ھاتر ءَ ماما قدیر ءِ برجم داشتگیں کیمپ ءُ دراجکشیں پند، سگ، اوپار ءُ مستقل مزاجی ءِ ھما درور اَنت کہ مدام بلوچ پدریچ ءِ یاداشتانی بھر بنت۔ ماما قدیر ءِ برجم داشتگیں شُد ہڑتالی نندانک کہ آئی ءِسوب ءَ آ نادراھی ءِآماچ بوت بلے آئی ءَ وتی جھد یل نہ دات، نادراھی ءُ پیراں سالی ءَ ھم آ پہ بلوچ راج ءَ جھد ءَ اَت ءُ ھمت ئِے چو مھکمیں کوہ ءَ مِک اَت۔
آئی ءَ گوشتگ ماما قدیر بلوچ ءِ پیمیں کِردارانی روگ پہ راج ءُ راجی جُنز ءَ مزنیں تاوانے ءُ اے کنڈانی پُر کنگ سکیں گرانیں کارے۔ ماما قدیر انسانی اگبالانی جُھد ءِ تہ ءَ ھما نامداریں کارست زانگ بیت کہ آئی ءَ دنیا ءِ دیم ءَ بلوچ ءِ لگتمالی ءُ آئی ءِ سر ءَ بیوکیں زوراکی پدر کُتگ اَنت ءُ پہ راج ءِ بنُکی ھکانی ھاتر ءَ دراجیں پند بُر اِتگ اَنت۔ اے سپر ءَ ماما ءِ نامی ئیں لانگ مارچ ماں گوستانک ءِ تاکاں نکش اِنت کہ آئی ءَ گار ءُ بے گواھی ءِ ھلاپ ءَ گوں ھمراھیں شال داں کراچی ءُ اسلام آباد ءَ مزنیں مارچے ءِ رھشونی کتگ۔ اے لانگ مارچ دنیا ءِ مستریں پند اَت کہ سرجمیں دنیا ئِے بلوچستان ءِ نیمگ ءَ دلگوش گور کُت۔ ماما گار ءُ بے گواھیں مردمانی ھما مھکمیں تور اَت کہ سیاہ شپاں ھم چو سُھب ءِ بام ءَ سھرا اَت۔
آئی ءَ گوشتگ اے راستی یے کہ مرچی آ جسدی بستار ءَ مارا گوں یکجاہ نہ اِنت، بلے آئی ءِ ھما شون داتگیں کشک، گھگیری ءِ ھیال مرچی ھم راج ءِ ھمک پُسگ ءِ دلانی تہ ءَ زِندگ اَنت ءُ اے داں ابد مان اَنت۔ بلوچ سیاسی جُھدکار ءُ آوکیں پدریچ ءَ لوٹ ایت کہ آ ماما قدیر بلوچ ءِ ھمے گھگیری ءِ لیکہ ءَ بہ زیر اَنت ءُ آئی ءِ پشت کپتگیں کاراں وتی کوپگاں بہ لڈ اَنت ءُ دیم ءَ بہ جُنز اَنت دانکہ آئی ءِ کتگیں کار بے ہچ مہ بنت۔