ایچ آر سی پی ءِ ریجنل کارگس تربت ءَ انسانی ھکانی میان استمانی روچ برجم دارگ بوتگ کہ آودا انسانی ھکاں بندوکیں مردین ءُ زالبولیں باسکاں مزنیں کچے ءَ بھر زرتگ ۔
مراگش ءَ تران کنان ءَ ایچ آر سی پی ءِ ریجنل کوآرڈینیٹر پروفیسر غنی پرواز ءَ انسانی ھکانی میان استمانی روچ ءِ رمس ءُ پژدر ءِ سرا چمشانک دیان ءَ گوشتگ اے روچ دومی جھانی جنگ ءَ پد مردمانی بنکی ھکانی میان استمانی جار ءِ یاتاں پرین ایت ۔ آئی ءَ گوشتگ کہ انسانی ھکانی میان استمانی منشور 10 دسمبر 1948 ءَ منگ بوتگ کہ سرجمیں جھان ءِ استانقنی زمہ واری گچین کنگ بوتگ انت ۔
پروفیسر ءَ اے روچ ءِ ارزشت درشان کتگ ءُ گوشتگ کہ دیمروئی ، ھک ءُ برابری ھما وھد ءَ بوت کت کنت وھدیکہ استان وتی مردمانی بنکی ھکانی اھترام ءَ بہ کنت ۔
آئی ءَ گوشتگ کہ پاکستان ءِ تہ مردمانی آزاتی لگتمالی ءِ آماچ انت وھدیکہ بلوچستان ءِ تہ ءَ اے چدوگنتر انت کہ ادے مردم وتی سلامتی ، آجوئی گوں وتی ھیالانی درشانی ءُ زند ءِ گوازینگ ءِ وڈیں بنکی ھکاں زبھر انت ۔
ایچ آر سی پی ءِ باسک خان محمد جان گچکی ءَ گوشتگ کہ بدبھتی ءَ ما یک ھنچیں استان ءِ تہ ءَ زند گوازینگ ءَ انت کہ ادے مردم یکشل ءَ ترس ءِ تہ ءَ انت ۔ آئی ءَ گوشتگ کہ جاور ھال ھنچوش جوڈ بوتگ انت کہ مردم چہ وتی مرزی ساہ زرت نہ کنت ۔ کبرانی سرا ھم گاٹ دیگ بوگ ءَ انت ءُ گچینی نامانی شک ھم پروشگ بوتگ انت ۔
مراگش ءَ اھوالکار الطاف بلوچ ، چاگردی باسک ماسٹر غنی بلوچ ءُ محمد کریم گچکی ءَ ھم تران کتگ ۔ آیاں ھاسکر ریاستی سروکی ءَ انسانی ھکانی لگتمالی ترندی ءَ گوں ایرجتگ ءُ وتی ھیال درشان اتگ انت ۔ آیاں گوشتگ کہ بلوچ ورنا جنین ءُ مردین بید ارزی یا الزام ءَ بندیگ جاھاں بند انت ءُ آیانی درگت ءَ کھول ھم سرپدی دیگ بوگ ءَ نہ انت ۔
ترانکاراں گوشتگ کہ میان استمانی اے روچ ءِ درگت ءَ چاگرد ءَ اے گپ مارگی انت کہ مئے کش ءُ گور ءِ نزورتریں تک گونڈویں جنک ءُ بچک ھم وتی بنکی ھکاں زبھر کنگ بوگ ءَ انت ۔
مراگش چن ءُ لانچ ایچ آر سی پی ءِ باسک سنیہ بلوچ ءَ کتگ ۔ مراگش ءِ گڈسر ءَ بھرزورکاں اے کول کتگ کہ انسانی ھکانی بحالی ، پھازگ ءُ دیمروئی ءَ وتی جھد ءَ برجاہ دار انت۔