چہ گوستگیں روچ ءَ ھاران ءَ ترندیں جنگ ءُ چوپ برجاہ انت ءُ پاکستانی لشکر ءِ کمک ءَ گیش مزنیں لشکر دمگ ءَ دیم دیگ بوتگ انت۔
بلوچستان ءِ دمگ چہ ھاران ءَ رس اتگیں ھالانی رد ءَ گوستگیں شپ ءَ ھاران ءِ گرک ڈیم ءِ دمگ ءَ سلاہ بندیں مردمانی ءُ پاکستانی لشکر ءِ نیام ءَ جنگ ءُ چوپ بوتگ کہ بازیں کلاکاں برجاہ بوتگ۔
بنشون ءِ رد ءَ جنگ ءِ وھد ءَ لشکر بازیں کچے ءَ ویل جاہ ءَ روان دیگ بوتگ اَنت ءُ ٹپیگیں کارندہ آمبولانس ءِ تہ ءَ شھر ءَ برگ بوتگ اَنت۔
ھال رس اِتگ کہ ھاران ءِ وئیل ءَ پاکستانی لشکر ءِ سئے کارندہ بیران ءُ بازیں ٹپیگ بوتگ اَنت۔
یات بہ بیت کہ گوستگیں روچاں بلوچستان ءِ جتا جتائیں دمگاں سلاہ بندیں گلانی ھمگرنچیں اُرشانی یک درچے برجاہ اِنت۔ پاکستانی لشکر، پولیس ءُ ریل ءِ پٹریانی سر ءَ جتا جتائیں دمگاں اُرش کنگ بوتگ، ھمے وھد ءَ روڈ بلاک ھم کنگ بوتگ انت۔
گوستگیں شپ ءَ بلوچ آجوئی ءِ سلاہ بندیں گل بلوچستان لبریشن فرنٹ ءَ بلوچستان ءِ دمگ چاگی ءِ نوکونڈی ءِ دمگ ءَ وت کُشیں اُرشے ءَ پاکستانی لشکر ءِ یک مستریں کیمپے نشانگ جوڑ کتگ ءُ پد ءَ اُرش کنوک کیمپ ءِ تہ ءَ شُتگ اَنت۔
نوکونڈی ءَ داں گڈی ھالاں جنگ برجاہ بوتگ۔
دومی نیمگ ءَ بلوچ آجوئی ءِ سلاہ بندیں گل بلوچ لبریشن آرمی ءَ بلوچستان ءِ جتا جتائیں دمگاں 29 اُرش ءُ راہ بندانی تہ ءَ 27 پاکستانی لشکر ءِ کوش ءُ 17 ٹپی کنگ ءِ زمہ واری زرتگ انت۔
چہ ھاران ءَ رس اتگیں ھالانی رد ءَ دمگ ءِ جاور انگت ءَ ناگیگ اَنت بلے انگت ءَ ھچ گل ءَ اے اُرشانی زمہ واری نہ زرتگ۔