بلوچستان لبریشن فرنٹ ( بی ایل ایف) ءَ چاگی ءَ پاکستانی لشکر ءِ کیمپ ءِ سر ءَ اُرش ءِ زمہ واری ءِ زورگ ءَ پد وتی زالبولیں پدائی اُرشکار ءِ اکس شنگ کتگ۔
گیشیں ھالانی رد ءَ مرچی شپ ءَ بلوچستان ءِ دمگ چاگی ءِ ھند نوکنڈی ءَ سلاہ بندیں مردماں پاکستانی لشکر ءِ مستریں کیمپ ءِ سر ءَ اُرش کتگ کہ اود ءَ یک وت کُشیں اُرشکارے ءَ اولی رند ءَ مستریں دروازگ ءَ تراک کتگ ءُ ایشی ءَ پد دگہ سلاہ بندیں مردم کمپان ءِ تہ ءَ اتکگ اَنت۔
چہ چاگی ءَ رس اتگیں ھالانی رد ءَ اُرش کنوک انگت ءَ کمپان ءِ تہ ءَ اَنت ءُ جنگ ءُ چوپ برجاہ اِنت وھدے کہ پاکستانی لشکر ءِ کارندھاں ھم اے وئیل ءِ پدرائی کتگ۔
بی ایل ایف ءِ جارکش میجر گوھرام بلوچ ءَ اے اُرش ءِ زمہ واری منگ ءَ پد رسانکدر ءَ دیم داتگیں یک کسانیں بیانے ءِ تہ ءَ گْوشتگ کہ گل ءِ ھواریں باسک سوب ءِ باسکاں نوکنڈی ءَ گوں ریکودک ءُ سینڈک ءَ ھمگرنچیں درملکی کارندہ ءُ انجینئرانی واستا جوڑ کتگیں مستریں کمپان ءِ سر ءَترندیں اُرشے کتگ۔
بی ایل ایف ءَ وتی آفیشل چینل ءَ وتی زالبولیں وتی پدائی اُرش کنوک ءِ اکس شنگ کنان ءَ جار جتگ کہ جند ندری زرینہ پنام ءِ ترنگ ماھو ءَ کمپان ءِ دَر ءِ پروشگ ءَ وت ءَ تراکینتگ ءُ ایشی ءِ آسر ءَ بی ایل ایف ءِ دگہ سرمچار کمپان ءِ تہ ءَ شُتگ اَنت۔
گل ءِ رد ءَ انگت ءَ جنگ برجاہ اِنت ءُ آیانی سرمچار بنجاھی بنجل ءِ تہ ءَ اَنت ءُ آپریشن ءِ گیشتریں ھال دیم ءَ شنگ کنگ بنت۔