بلوچستان ءِ جتاجتائیں دمگاں پاکستانی پوج ءِ دست ءَ سے مردم آوار جنگ بیتگ اَنت ھمے وڑ اسلام آباد ءَ بیگواھیں نودربر ءِ یل کنائینگ ءِ ھاتر ءَ زھرشانی کنگ بیتگ-
کیچ ءِ تھسیل تمپ ءِ ھند گومازی ءَ پاکستانی پوچ ءُ ڈیتھ اسکواڈ ءِ کارمنداں شمبے ءِ بانگواہ ءِ چار ءَ لوگے ءِ سر ءَ بیڑبرتگ ءُ یک ورنایے آوار جتگ-
آوار جنگ بیتگیں ورنا ءِ پجّار عمران ء نادل نام ءَ چہ بیتگ ءُ یکروچے ءَ پد عمران ءِ سیر بوگی بیتگ بلے آ آوار جنگ ءُ بیگواہ کنگ بیتگ-
ھمے وڑ تمپ ءِ دمگ سرنکن ءَ گوستگیں شپ ءِ ساھت سے ءَ بزاں 26 نومبر 2025 ءَ پاکستانی پوج ءَ بیڑبرتگ یاسر ء نعمت اللہ آوار جتگ ءُ بیگواہ کتگ-
ھمے وڑ تیاب دپی شھر گوادر ءَدے کوسٹ ھسپتال ءَ بیست ءُ چار نومبر 2025 ءَ پاکستانی پوج ءِ چیریں ادارہ ایم آئی ءِ کارندھاں غلام قادر ء مراد بخش نامیں ورنایے آوار جتگ ءُ بیگواہ کتگ-
دومی نیمگ ءَ اسلام آباد ءَ بلوچ نودربر سعید بلوچ ءِ زورانسری بیگواھی ءِ ھلاپ ءَ قائداعظم یونیورسٹی ءَ بلوچ اسٹوڈنٹس کونسل ءِ زھرشانی نندانک ءَ سیمی روچ ءَ ھم برجاہ ءَ اِنت-
نودربراں یونیورسٹی ءَ زھرشانی بُنجلے برجاہ داشتگ کہ اود ءَ یکشل ءَ نند اَنت سعید بلوچ ءِ یل کنائینگ ءِ لوٹ ءَ کنگ ءَ اَنت-
زھرشانی کنوکانی رِد ءَ سعید بلوچ ڈی ایس ایس ڈپارنمنٹ ءِ نودربرے ءُ ھشت جولائی ءَ زورانسری آوار جنی ءِ نشانگ کنگ بیتگ-قائداعظم یونیورسٹی ءِ نودربرانی گوشگ اِنت کہ آ چہ اسلام آباد ءِ ٹول پلازہ چیریں ادارھانی کارندھاں آوار جتگ ءُ بیگواہ کتگ کہ چریشی ءَ پد آئی ءِ درگت ءَ ھچ وڑیں ھال نیست-
نودربراں سعید بلوچ ءِ زوت یل کنگ ءُ وئیل ءِ پلگاریں پٹ ءُ پول ءِ لوٹ کتگ-