بلوچستان ءَ زورانسری آوار جنی ءِ دْرچ یکشل ءَ برجاہ ءَ اِنت ھژدہ مردم آوار جنگ ءُ دو لاش دزکپتگ

بلوچستان ءِ جتاجتائیں دمگاں پاکستانی پوج ءُ چیریں ادارھانی دست ءَ ھژدہ مردم آوار جنگ ءُ بیگواہ کنگ بیتگ اَنت وھدے کہ دو لاش ھم دزکپتگ-

گیشیں ھالانی رِد ءَ چہ ڈیرہ بگٹی ءَ پاکستانی پوج ءَ شھر ءِ جتاجتائیں دمگاں بازیں لوگانی سر ءَ بیڑبرتگ ءُ ھمے میان ءَ پانزدہ مردم آوار جتگ ءُ بیگواہ کتگ-

دمگی اِھوالکار ءِ گوشگ اِنت کہ بیگواہ کنگ بیتگیں مردمانی تہ ءَ نُھ ءِ پجّار بیتگ اَنت کہ آیانی تہ ءَ یکیں کھول سے مردم قصیر ریحان بگٹی، جھا خان مھر اللہ بگٹی ءُ خان مھر اللہ بگٹی ھوار اَنت-

آ دگہ بیگواہ بیتگیں مردمانی پجّار شبیر صحبت بگٹی، منگل غلام بکس بگٹی، حسن علی شیر بگٹی، رشید جان محمد بگٹی، نوروز نھال بگٹی ءُ اسلام رمضان بگٹی ھوار اَنت-

اِھوالکار ءِ گوشگ زورانسری بیگواہ کنگ بیتگیں سرجمیں مردم ناشناسیں جاھے ءَ برتگ اَنت کھول ھچ وڑیں سرپدی دیگ نہ بیتگ اَنت-

ھمے وڑ گوستگیں شپ ءَ گریڈ اسٹیشن لنک دگ، سوراب ءَ کساس ساھت یک ءَ سادھیں پوشاکانی تہ ءِ سے گاڑیاں ھمگرنچیں سلاہ بندیں مردماں محمد اسلم ءِ لوگ سر ءَ بیڑبرتگ آئی ءِ چُک محمد شعیب زورانسری بیگواہ کتگ- کھول ءَ آئی ءِ سلامتی یل کنائینگ ءِ لوٹ کتگ-

ھمے وڑ گوستگیں روچ ءَ ھب چوکی ءَ پاکستانی پوج ءَ چہ بازار شیرجان بلوچ ء زباد جھمنند جھاؤ کورک آوار جتگ ءُ بیگواہ کتگ-

دومی نیمگ ءَ آواران ءَ نوکو ء ائیدو ھما وھد ءَ پاکستانی پوج ءَ آوار جتگ وھدے آ 20 نومبر ءَ چہ آواران بازار ءَ دیم پہ جھاؤ روگ ءَ بیتگ-

ھمے وڑ کلات ءَ دو ناشناسیں مردمانی لاش دزکپتگ اَنت کہ آیانی پجّار انگت نہ بیتگ اَنت پہ پجّار ءِ ھاتر ءَ نادُراھجاہ ءَ برگ بیتگ اَنت-

زانگ بہ بیت بلوچستان ءَ چیزے وھد بیت کہ زورانسری آوار جنی ءُ بیگواھیں مردمانی لاشانی دور دیگ ءِ تہ ء گیشی آوارتگ-