بلوچستان: جنکے ءَ ھوار پنچ مردم پوج ءِ دست ءَ بیگواہ، دو بیگواھیں مردمانی لاش دزکپتگ انت

بلوچستان ءِ جتاجتائیں دمگ ھب، پنجگور، کیچ ءُ ھزدار ءَ جنکے ءَ ھوار پنچ مردم پوج ءَ آوار جنگ ءَ پد بیگواہ کتگ انت ءُ دو بیگواھیں مردمانی لاش دزکپتگ انت-

سر بیتگیں ھالانی رد ءَ آوار تیرتیج ءِ جھمنندیں نسرینہ ء دلاور چہ ھب چوکی ءِ دمگ دڑو ءَ پاکستانی پوج ءَ لوگ ءَ آوار جتگ ءُ بیگواہ کتگ-

اھوالانی رد ءَ بیست ءُ دو نومبر ءِ شپ ءَ سیکورٹی پورسز ءَ نسرینہ چہ لوگ ءَ آوار جتگ ءُ بیگواہ کتگ –

وائس فار بلوچ مسنگ پرسنز ءِ چیئرمین نسر اللہ ءَ ھال راست کنان ءَ گوشتگ گوستگیں شپ ءَ ھب چوکی ءِ ھند دڑو ءَ پوج ءَ دلاور ءِ لوگ ءَ بیڑ برتگ ءُ آئی ءِ کسان سالیں جنک آوار جتگ ءُ بیگواہ کتگ –

آئی ءَ اُستانی سرکار ءَ زوتیں گامگیج ءُ آئی ءِ یل کنگ ءِ لوٹ کتگ ءُ گوشتگ کہ آمیدگس ءَ پیش کنگ بہ بیت کانون ءِ دیم ءَ آرگ بہ بیت اگاں بے گناھے گڑا یل کنگ بہ بیت انت-

گیشیں ھالانی رِد ءَ گوستگیں روچ ءَ بیگاہ ءِ چار ءُ نیم ءَ پنجگور ءِ بُنجاھی کار ءُ باری دمگ چتکان بازار ءَ پاکستانی پوج ءَ یک مردمے آوار جتگ ءُ بیگواہ کتگ-

آوار جنگ بیتگیں مردم ءِ پجّار بلال ء عبدالواحد جھمنند عیسیٰ نام ءَ چہ بیتگ-

ھمے وڑ مروچی پنجگور ءِ دمگ پروم ءَ پاکستانی پوج ءَ دو مردم نظیر ء بیبگر ءُ اعطاءاللّہ ء رشید جھھمنند پروم پَنجگُور زورانسری آوار جتگ ءُ بیگواہ کتگ اَنت ۔

زانگ بہ بیت نظیر ءِ چُک شھزاد ھم لھتیں ماہ ءَ پیسر زورگریں پاکستانی پوج ءَ زورانسری آوار جتگ ءُ بیگواہ کُتگ کہ آ انگت ھم بیگواہ اِنت ۔

ھمے عطاءاللّہ ءِ برات جنگیان ھان ھم لھتیں وھد ءَ پیسر زورگریں پاکستانی پوج ءَ زورگریں بیگواہ کُتگ ۔

ھمے وڑ پاکستانی پوج ءَ گوستگیں روچ ءَ چہ تلار ءِ بنجل ءَ ثنا اللہ ء دین مھمد جھمنند تمپ سرنکن نامیں ورنایے آوار جتگ ءُ بیگواہ کتگ۔

ھالانی رِد ءَ ثناء اللہ کراچی ءَ دیم پہ تمپ ءَ روگ ءَ بیتگ کہ پاکستانی پوج ءَ بیگاہ ءِ شش ءَ چہ گْوادر ءُ تربت ءِ میانی ھند تلار ءَ آوار جتگ ءُ بیگواہ کتگ۔

دومی نیمگ ءَ ھژدہ نومبر 2025 ءَ سوراب ءَ بُنجاھی آر سی ڈی دگ ءَ چہ ریاستی چیردستی ءَ کارکنوکیں ڈیتھ اسکواڈ کارندھانی دست ءَ آوار جنگ بیتگیں اسماعیل ء الھی بخش جھمنند باغبانہ ھُزدار ءِ لاش نوزدہ نومبر 2025 ءَ ھُزدار ءِ دمگ باغبانہ دزکپتگ-

اسماعیل بلوچ ءِ کوش ءِ گپ بی وائی سی ءَ راست کتگ-

ھمے وڑ دشت ءِ دمگ کنچتی ءَ شانزدہ نومبر ءِ شپ ساھت دو ءَ آوار جنگ بیتگیں اجاز ء دین محمد گوستگیں شپ ءَ پاکستان پوج ءَ گوں ناگیگیں جاوراں یل کتگ –

کھول ءَ پہ الاج ھاتر ءَ تربت ءَ برتگ اود ءَ آئی ءَ ٹپّانی درد نہ سگ اِتگ ءُ بیران بوتگ-

کھول ءِ گوشگ اِنت کہ گوستگیں شپ ءَ پوج ءَ فون کتگ کہ بیا اِت وتی مردم بہ بر اِت آئی ءِ جاور ناگیگ اِنت وھدے کہ اجاز لوگ ءَ آرگ بیتگ آئی ءِ دست ءُ پاد گوات بیتگ اَنت سک آزار دیگ بیتگ-

کھول ءِ گوشگ اِنت کہ اجاز وھدے کہ گوں ناگیگیں جاوراں لوگ ءَ آرگ بیتگ آئی ءَ دپ وت گوشتگ کہ من ورگ اش نداتگ سک آزار ءِ داتگ ءُ دراھگ ءِ وھد ءَ من آں یک آپ رنگیں چیزے زور وارینتگ اِت ءُ چریشی ءَ پد آئی ءِ دل ءُ لاپ ریتکگ اَنت-

کھول ءِ ھمے گوشگ اِنت کہ آ یک زھرناکیں درمانے بوتگ-

مروچی کھول ءَ اجاز پہ الاج ھاتر ءَ تربت ءَ برتگ ساھت سے ءِ نزیک ءَ آئی ءَ ٹپّانی درد نہ سگ اِتگ ءُ بیران بیتگ-