کراچی ، بلوچستان ءُ پنجاب ءَ دو براتاں ھوار نُھ مردم آوار جنگ ءُ بیگواہ کنگ بیتگ اَنت-
گیشیں ھالانی رِد ءَ فاسٹ یونیورسٹی لاھور ءَ وانوکیں ورنا شوزب سلیم ء حاجی سلیم بزدار جھمنند ماڈل ٹاؤن، ڈیرہ غازی 23 اکتوبر ءَ ھما وھد ءَ زورانسری بیگواہ کتگ وھدے آ یونیورسٹی ءَ روگ ءَ بیتگ-
شوزب سلیم، فاسٹ یونیورسٹی بی ایس سول انجینئرنگ ءِ ھپتمی سمسٹر ءِ نودربرے-
اِھوالکار ءِ رِد ءَ ورنا پاکستانی چیریں ادارھانی کارندھاں آوار جتگ کہ آئی ءِ منانک ھست اَنت-
شال ءِ دمگ روکپتی بائی پاس لنک دگ ءِ جھمنندیں ورنا نجیب اللہ ء دوران جتوئی 22 اکتوبر ء ندیم ء آزاد خان جتوئی 29 اکتوبر ءَ زورانسری بیگواہ کتگ-
دوئیں وئیلاں پاکستانی پوج ءَ لوگانی سر ءَ بیڑبرتگ ورنا آوار جتگ ءُ بیگواہ کتگ اَنت-
ھمے وڑ بلوچستان ءِ تیاب دپی شھر گوادر ءَ پاکستانی چیریں ادارہ ایم آئی ءُ ڈیتھ اسکواڈ کارندھاں دو برات آوار جتگ ءُ بیگواہ کتگ اَنت-
گیشیں ھالانی رِد ءَ پرندوشگیں ساھت یک ءَ گوادر ءِ دمگ پسنی ءَ وارڈ نمبر یک ءَ پاکستانی پوج ءِ چیریں ادارہ ایم آئی ءُ آئی ءِ چیردستی ءَ جوڑ کتگیں ڈیتھ اسکواڈ کارندھاں بیڑبرتگ دو برات آوار جتگ ءُ گوں وت برتگ اَنت-
آوار جنگ بیتگیں براتانی پجّار میانداد ء فقیر محمد ءُ دوشمبے ءِ فقیر مھمد آوار جتگ ءُ بیگواہ کتگ اَنت-
ھالانی رد ءَ پاکستانی پوج ءَ چار روچ پیش چہ کراچی ءَ کیچ ءِ جھمنندیں دو ورنا ملمہ بلوچ ء جمال ءُ عابد بلوچ آوار جتگ ءُ بیگواہ کرتگ اَنت۔ ملمہ بلوچ سنگ آباد ءُ آبد بلوچ سری کلگ ءِ جھمنند اِنت۔
ھمے وڑ ءَ پاکستانی پوج ءَ گوستگیں روچ چہ گونڈسرین ءَ جنگیان بلوچ ء فقیر محمد نامیں کماشے آوار جتگ ءُ بیگواہ کرتگ۔ جنگیان بلوچ یک شپانکے ءُ چہ وتی جند ءِ گس ءَ آوار جنگ ءُ بیگواہ کنگ بیتگ۔
شانزدہ نومبر 2025 ءَ کیچ ءِ دمگ بلیدہ ءِ ھند چہ ریکو ءَ پاکستانی پوج ءَ یک سُھیل ء محمد شریف نامیں ورنایے آوار جتگ ءُ بیگواہ کتگ-
ھمے وڑ ھژدہ نومبر 2025 ءَ کیچ ءِ دمگ بالگتر ءِ ھند گڈگی ءَ پاکستانی لشکر ءَ بیڑبرتگ امیربخش ء گنگُزار جھمنند کیلکور بالگتر آوار جتگ ءُ بیگواہ کتگ-
انچش ھژدہ نومبر 2025 ءَ ڈیتھ اسکواڈ ءِ کارندھاں بُنجاھی آر سی ڈی دگ سُھراب ءَ اسماعیل بلوچ جھمنند باگبنہ ھُزدار آوار جتگ ءُ بیگواہ کتگ اَنت-
زانگ بہ بیت بلوچستان ءَ یک نیمگے زورانسری آوار جنگ ءُ دومی نیمگ ءَ بیگواھیں مردمانی لاش دور دیگ بیگ ءَ اَنت-