بلوچستان ءَ پاکستانی پوج ءِ سر ءَ اُرش، چار سرمچار نمیران

بلوچستان ءِ جتا جتائیں جاھاں سلاہ بندیں مردماں پاکستانی پوج ءُ دگہ چیزانی سر ءَ اُرش کتگ انت ءُ ھمے وڑ پاکستانی پوج ءِ ڈرون اُرشان چار سرمچار نمیران بیتگ انت-

یو بی اے ءِ جارکش مزار بلوچ ءَ وتی شنگ کتگیں درشان ءَ گوشتگ چار نومبر ءِ سھب ءِ ساھت ھپت ءُ نیم ءَ کلات ءِ دمگ کوہ ناگائی ءِ کوھی ھنداں زورگریں پاکستانی پوج ءِ ڈرون اُرشاں ھمراھیں گل بلوچ لبریشن فرنٹ ءِ یک سرمچارے ءَ ھوار چار سرمچار شھید بیتگ انت-

آئی ءَ گوشتگ شھید بیتگیں سرمچارانی تہ ءَ ڈاکٹر مدثر شاھوانی، شھباز خان مری شاکر جتوئی، سنگت ھارس محمد شھی ھوار انت کہ ایشانی توک ءَ ڈاکٹر مدثر ھمراھیں گل بلوچ لبریشن فرنٹ ءِ سرمچار بیتگ-

ھمے وڑ ءَ بلوچستان ءِ جتاجتائیں دمگاں پاکستانی پوج ءُ ٹاور ءِ سر ءَ بیتگیں اُرشانی زمہ واری بی ایل اے، بی ایل ایف ءُ بی آر جی ءَ منّ اِتگ اَنت-

ھمے وڑ بلوچ لبریشن آرمی ءِ جارکش جیئند بلوچ ءَ وتی شنگ کرتگیں درشان ءِ تہ ءَ گوشتگ کہ بی ایل اے ءِ سرمچاراں بلیدہ ءُ مستونگ ءَ دو جتاجتائیں اُرشاں پاکستانی پوج نشانگ کتگ ءُ تاوان داتگ۔

جارکش ءَ گوشتگ کہ کیچ ءِ ھند بلیدہ گلی ءَ مرچی بی ایل اے ءِ سرمچاراں زورگریں پاکستانی پوج ءِ پیادگیں کارندہ ھما وھد ءَ نشانگ کرتگ اَنت کہ آپہ زورگریں پاکستانی پوج ءِ کاروان ءِ پھازداری ءَ بوتگ اَنت۔ اُرش ءِ آسر ءَ پاکستانی پوج ءِ یک کارمندے جاھی مرتگ ءُ یکے ءَ ٹپی بوتگ۔

جارکش ءَ گوشتگ کہ بی ایل اے ءِ سرمچاراں سے شمبے ءِ شپ ءَ مستونگ شھر ءَ برجاھیں پاکستانی پوج ءِ بُنجاھی بنجل ءِ سر ءَ گرنیڈ لانچر ءِ گولا آس داتگ ءُ دژمن ءِ سنگر نشانگ کرتگ اَنت۔ اُرش ءِ آسر ءَ زورگریں پوج ءَ جانی ءُ مالی تاوان بوتگ۔

ھمے وڑ بلوچستان لبریشن فرنٹ ءِ جارکش میجر گْوھرام بلوچ ءَ شنگ کرتگیں درشان ءِ تہ ءَ گوشتگ کہ مئے سرمچاراں ھژدہ نومبر ءَ سے شمبے ءِ سُھب ءِ دہ ءَ کیچ ءِ دمگ بالگتر ءَ آسانک کنڈگ ءَ زورگریں پاکستانی پوج ءِ کاروان ءَ پھاز دیوکیں کارندھانی سر ءَ سنگر گپتگ ءُ نوکیں ءُ مزنیں سلاھاں چہ اُرش کرتگ چریشی ءِ آسر ءَ زورگریں پاکستانی پوج ءَ جانی ءُ مالی تاوان چست کنگ کپتگ-

جارکش ءَ گوشتگ دومی کاروائی ھژدہ نومبر ءِ شپ ءَ بلوچستان لبریشن فرنٹ ءِ سرمچاراں آواران ءِ دمگ بزدار وھلی ڈھل ءِ ھند سر ءَ برجاھیں یوفون ٹاور ءِ تراکناکیں شورواں چہ نشانگ کرتگ ءُ تباہ کرتگ –

بلوچ ریپبلکن گارڈز ءِ جارکش دوستین بلوچ ءَ رسانکدر ءَ وتی شنگ کُرتگیں درشان ءِ تہ ءَ گوشتگ کہ بی آر جی ءِ سرمچاراں شال ءِ دمگ اسپنی دگ ءَ زورگریں پاکستانی پوج ءِ کارندہ دستی بمب اُرش ءَ نشانگ کرتگ اَنت ۔

جارکش ءَ گوشتگ کہ چہ اے اُرش ءِ آسر ءَ زورگریں پاکستانی پوج ءَ جانی ءُ مالی تاوان رستگ۔

درشانانی گُڈی ءَ سے گلاں اُرشانی زمہ واری منّ اِتگ گوشتگ کہ مئے اُرش داں بلوچستان ءِ وتواجھی ءَ تاں برجاہ بنت-