نال : ورنا ءِ زورانسری آوار جنی ءِ ھلاپ ءَ زھرشانی، گپ دیوان سوبمند ، چہ کیچ ءَ ورنا دومی رند ءَ زورانسری بیگواہ

بلوچستان ءَ زورانسری آوار جنی ءِ دْرچ یکشل ءَ برجاہ، وھدے کہ کھول ءِ زھرشانی برجاہ ، انتزامیہ ءَ گوں گپ دیوان سوبمند-

چہ ھُزدار ءَ ھال سر بیتگ کہ زورانسری بیگواہ حزیفہ غفار ءِ کھول ءَ نال ءَ سی پیک دگ زھرشانی کنان ءَ بند کتگ-

چہ نال ءَ سیادی داروکیں حذیفہ غفار، ء مولوی عبدالغفار بزنجو پنچ نومبر 2025 ءَ چہ نال درنیلی ءَ پاکستانی پوج ءُ چیریں ادارھاں زورانسری بیگواہ کتگ- آئی ءِ یل نہ کنگ ءِ بگیری ءَ کھول ءَ زھرشانی کتگ-

زھرشانی ءِ سوب ءَ شھدگ سر ءَ گاڑیانی روگ آیگ بند بیتگ ءُ گاڑیانی دراجیں لین لگّ اِتگ-

ھمے وھد ءَ دمگی انتزامیہ گوں زھرشانی کنوکانی میان ءَ گپ ءُ دیوان بیتگ ءُ انتزامیہ زھرشانی کنوکیں مردم دلجمی داتگ اَنت کہ آ حزیفہ غفار ءِ یل کنائینگ ءِ ھاتر ءَ وتی کرد ءَ پیلو کنت-

چریشی ءَ پد زھرشانی ھلاس کنگ بیتگ ءُ دگ پچ کنگ بیتگ-

ھمے وڑ کیچ یونین کونسل گلی کوچہ بلیدہ ءِ نامینتگیں وائس چیئرمین پزیر ناصر پلیزئی یکرندے پد ءَ زورانسری بیگواہ کتگ-

کھول ءِ رِد ءَ پزیر ناصر ھشت نومبر 2025 ءِ بیگاہ ءَ کساس ساھت سے ءَ وتی کسان سالی ئیں چُک کھدہ یوسف میتگ ءِ مدرسہ ءَ یل دیگ ءَ پد واتر آیگ ءَ بیگواہ بیتگ، اشی ءَ پد آئی ءِ ھچ وڑیں ھال نیست-

کھول ءَ راست کتگ کہ پزیر ناصر ھال اھوال سرجمی ءَ گوں بند اِنت ءُ سرجمیں جُھد ءَ اَبید آئی ءِ ساڑی بیگ ءِ درگت ءَ ھچ وڑیں ھال نیست-

زانگ بہ بیت کہ اے اشانی دومی رند اِنت کہ بیگواہ کنگ بیگ ءَ اِنت- اشی ءَ ساری آ چار فروری 2025 ءَ گوادر ءَ پاکستانی پوج ءَ آوار جتگ ءُ آ کساس یک ماھے ءَ پد ھپت ستمبر ءَ یل کنگ بیتگ- آئی ءِ اول رند ءِ زورانسری آوار جنی ءِ ھلاپ ءَ ھک دے تھریک بلوچستان نیمگ ءَ چہ ڈپٹی کمشنر کارگس گوادر ءِ دیم ءَ زھرشانی نندانک ھم دیگ بیتگ کہ ڈپٹی کمشنر ءِ دلجمی دیگ ءَ پد ھلاس کنگ بیتگ-