بلوچستان پوسٹ پتر ھال ءَ سر بیتگیں نومبر ءِ اولی ھپتگ ءَ چہ بلوچستان ءِ جتا جتائیں دمگاں زورانسری بیگواہ کنگ ءِ بازیں راستیں اھوال سر بیتگ انت-
دمگی مردمانی رد ءَ حاجی شعیب ء وحید بخش جھمنند تسپ پنجگور کہ ھپت نومبر ءِ شپ ءِ ساھت دوازدہ ءِ نزیک ءَ پاکستانی لشکر ءَ دزگیر کنگ ءَ پد بیگواہ کتگ-
ھمے وڑ جلال ء جمیل جھمنند کیچ تمپ گومازی 8نومبر ءِ شپ ءِ ساھت دو بج ءِ نزیک ءَ پاکستانی لشکر ءَ چہ وتی گس ءَ دزگیر ءُ بیگواہ کتگ۔
سوراب ءِ جھمنندیں شفیق احمد ء نور محمد 5 نومبر ءَ سھب ءِ 10:30 ءَ شال ءِ دمگ کلی بیرمزئی ءَ چہ باروری روڈ ءَ پاکستانی لشکر ءَ زورانسری دزگیر کتگ ءُ بیگواہ کتگ۔
ایشی ءَ ابید چہ ڈیرہ بگٹی ءَ عبداللہ ء توسوبگٹی زورانسری بیگواہ کنگ ءِ بابت ءَ ھم نا پدریں ھال رس اِتگ۔ دمگی مردمانی رد ءَ پاکستانی لشکر ءَ آ روچ ءِ رھمان دزگیر کتگ ءُ ناشناسیں جاھے ءَ برتگ۔ اے مرد پاکستان پٹرولیم لمیٹڈ ءِ ملازمے۔