ھب چوکی : ورنا ءِ زورانسری آوار جنی ءِ ھلاپ ءَ زھرشانی، کراچی، شال شھدگ بند

بلوچستان ءِ باپاری شھر ھب چوکی ءَ گوستگیں شپ ءَ زورانسری بیگواھیں ورنا ءِ یل نہ کنگ ءِ ھلاپ ءَ زھرشانی کنگ بیتگ، چریشی ءِ سوب ءَ کراچی، شال شھدگ پہ گاڑی واستا بند کنگ بیتگ-

گیشیں ھالانی بیگواھیں ورنا مارو کوہ بلوچ کھول نیمگ ءَ چہ شال، کراچی بُنجاھی شھدگ سر ءَ ھب بھوانی ءِ ھند سر ءَ زھرشانی نندانک برجاہ ءَ اِنت-

زھرشانی کنوکاں لوٹ کتگ کہ زورانسری بیگواہ مارو کوہ بلوچ دیم ءَ آرگ بہ بیت-

دومی نیمگ ءَ نندانک سوب ءَ کراچی، شال شھدگ سر ءَ گاڑیانی دراجیں لین لگ اِتگ-

پولیس ءِ مزنیں کچے ءَ، ڈی ایس پی ھب سرکل امام یعقوب بلوچ، ایس ایچ او بیروٹ عطااللہ جاموٹ، ءُ ایس ایچ او ھائیٹ امین ساسولی ءِ سروکی ءَ اے وھد ءَ ساڑی اَنت- زھرشانی کنوکاں گوں گپ دیوان کنگ جُھد ءَ اَنت – بلے زھرشانی کنوکانی گوشگ اِنت کہ ورنا ءِ یل کنائینگ ءَ تاں زھرشانی برجاہ بیت-