گوادر: کوسٹ گارڈ ءُ لیویز ءِ کارندھاں تیل ءِ بنجلانی سر ءَ بیڑ برتگ

بلوچستان ءِ تیابدپی شھر گوادر ءَ ھواریں دمگ جیونی ءِ زِر ءِ لمب کنٹانی ھور مُچیں کاپر ءَ کوسٹ گارڈ، لیویز ءَ بیڑ برتگ ءُ اود ءَ ٹرانسپورٹرانی تیل بنجل ءُ پرپٹ ءُ ساز ءُ سامان مانداشتگ انت-

اھوالانی رد ءَ کوسٹ گارڈ ءُ لیویز ءَ مروچی سھب ءَ اود ءَ بیڑ برتگ ءُ تیل کشیں کایک ءُ تیل بنجل جاہ ءُ پرپٹ بازیں کساسے ءَ مانداشتگ انت-

تیل ءِ واپار کارانی رد ءَ کوسٹ گارڈ ءُ دگہ ادارہ لکانی ھساب ءَ ٹکس زیرگ ءَ ابید اود ءَ مردماں واپار کنگ ءَ نیلگ ءَ انت –

تیل ءِ واپارانی گوشگ انت کہ اود ءَ ھزاراں مھلوک بلوچستان ءِ دور دوریں ھند ءُ دمگاں اتکگ ءُ وتی دو وھد ءِ لاپ ءَ والینگ ءَ انت بلے اے روزگار ءَ ھم مھلوک ءَ ٹکس ءُ ملام ءَ ابید نیلگ ءَ انت-

زانگ بہ بیت روکپتی ءُ رودراتکی بلوچستان ءِ کش اتگیں لکیر ءَ دوئیں نیمگانی مھلوک ءِ روزگار تھنا سیمسر انت بلے بازیں جاھاں اود ءَ مھلوک ءَ پہ روزگار ءَ تاوان ءُ دگہ جیڑھانی دیمپانی انت-