بلوچستان ءِ دمگ کلات ءَ پاکستانی لشکر ءُ بلوچ آجوئی لوٹوکیں مردمانی نیام ءَ سیمی روچ اِنت کہ جنگ ءُ چوپ برجاہ برجاہ اَنت۔ واکداراں گوستگیں روچ ءَ جتا جتائیں جاھاں بوتگیں جنگ ءُ چوپاں بازیں فوجی کارندھانی بیرانی ءِ پدرائی کتگ۔
نوکیں ھالانی رد ءَ مرچی سھب ءَ جنگ ءُ چوپ ءِ ترندی کم بوتگ ءُ ھمے وھد ءَ لشکر دمگ ءَ بیران بوتگیں کارندھانی لاشانی شوھازگ ءُ ایمبولینسانی ھواری ءَ دمگ ءَ جاڑیگ اِنت۔
گوستگیں شپ ءَ بازیں کارندھانی لاش چِست کنگ بوتگ اَنت بلے شپ ءَ آپریشن بند کنگ بوتگ۔
پنچ شمبے ءِ روچ ءَ بلوچ آجوئی لوٹوکاں پاکستانی لشکر ءِ سر ءَ جتاجتائیں جاھاں سنگر گپتگ ءُ اُرش کتگ کہ لشکر کاروان ءِ شکل ءَ وتی پوسٹاں راشن سر کنگ ءَ بوتگ-
گوستگیں روچ ءِ سھب ءَ آجوئی لوٹوکاں مورگند ءِ جاہ ءَ دگہ اُرشے کتگ ءُ لشکر ءِ پیادگیں سپاھیگ کُشتگ ءُ آیانی سلاہ دست گپتگ اَنت۔ پد ءَ دمگ ءَ سر بوھوکیں کاروان ھم سکیں اُرشانی آماچ بوتگ اَنت۔
وھدے کہ ھال ھست کہ سرجمیں روچ ءَ برجاہ بوتگیں درگیجگ ءَ آجوئی لوٹوکیں مردمانی نیمگ ءَ گن شپ ءِ ھیلی کاپٹر ھم نشانگ جوڑ کنگ بوتگ اَنت۔
دومی نیمگ ءَ ھیسار ءِ جاہ ءَ فورسز ءِ سئے گاڑیانی سر بندگ ءُ نشانگ جوڑ کنگ بوتگ اَنت کہ ایشی ءِ تہ ءَ ایس ایس جی کمانڈو بیران بوتگ اَنت ءُ آیانی سلاہ ءُ دگہ نوکیں سامان آجوئی لوٹوکیں مردماں گوں وت برتگ اَنت۔
پاکستان ءِ واکداراں اے اُرش ءِ پدرائی کتگ ءُ گْوشتگ کہ دو کمانڈو ءَ ھوار شش کارندہ بیران بوتگ اَنت کہ آھانی تہ ءَ نائیک طارق، سپاھی مزمل، سپاہی فراز، سپاہی اعظم نواز، لانس نائیک شاہجاہان ءُ سپاہی ابشار ھوار اَنت۔
بلے دمگی مردمانی رد ءَ بیران بوتگیں مردمانی کچ گیشتر اِنت ءُ واکدار چہ گوستگیں روچ ءَ دمگ ءَ وتی بیگواھیں کارندھانی شوھازگ ءِ جھد ءَ اَنت۔
داں انوگ ءَ ھچ گل ءَ اے اُرشانی ذمہ واری نہ زرتگ۔ بلے بلوچ آجوئی دوستیں سلاہ بندیں گل –گچینی بلوچ لبریشن آرمی اے دمگ ءَ پرکار اَنت ءُ پیسر ءَ ھمے وڑیں اُرش ھم کتگ اَنت ئِے۔