اگاں یک ھپتگے ءِ تہ ءَ بالاچ دلوش یل کنگ نہ بوت گڑا سی پیک روڈ ءِ سر ءَ زھرشانی نندانگ دے ایں۔ کھول
تربت اپسر چہ بلوچی بازار ءَ زورانسری ءَ بیگواہ کنگ بوتگیں نا بالگیں نودربر بالاچ دلوش ءِ کھول ءَ تربت پریس کلب ءَ پریس کانفرنس کتگ ءُ گشتگ کہ 21 اکتوبر 2025 ءَ پاکستانی لشکر ءَ بالاچ دلوش چہ آئی ءِ لوگ ءَ اپسر بلوچی بازار ءَ آوار جتگ ءُ بیگواہ کتگ کہ داں انگت ءَ بیگواہ انت-
کھول ءِ گْوشگ ءِ رد ءَ بالاچ دلوش یک نابالگیں نودربرے کہ ھشتمی کلاس ءَ وانگ ءَ اِنت ءُ انوگ ءَ آئی ءِ چکاس برجاہ اَنت۔
کھول ءَ گْوشتگ: اگاں بالاچ دلوش ءِ سر ءَ ھرچ وڑیں بھتامے ھست گُڑا آمیدگس ءَ پیش کنگ بہ بیت دانکہ آئی ءَ را کانودی کارروائی ءِ ھک بہ بیت۔
کھول ءَ گْوشتگ کہ آیاں ڈپٹی کمشنر کیچ ءُ دگہ ضلعی کارندھاں گوں گند ءُ نند کتگ، اود ءَ ڈپٹی کمشنر ءَ یک ھپتگے ءِ تہ ءَ دلجمی داتگ، بلے یک ھپتگے ءِ گوزگ ءَ ابید ھم ھچ وڑیں گامگیج زیرگ نہ بوتگ۔
کھول ءَ گیش گْوشتگ کہ آیاں ایف آئی آر درج کتگ بلے تاں انوگ ءَ ھچ وڑیں آسر دیم ءَ نہ اتکگ۔
آھاں جار جتگ اگاں یک ھپتگے ءِ تہ ءَ بالاچ دلوش یل کنگ نہ بوت گڑا سی پیک روڈ ءَ ھوار دگہ جاھاں دھرنا ءُ زھرشانی بندات کن اَنت۔