بلوچستان ءِ جتاجتائیں دمگاں پاکستانی پوج ءُ ڈیتھ اسکواڈ کارندھانی سر ءَ بیتگیں اُرشانی زمہ واری بی ایل اے ءُ بی ایل ایف ءَ منّ اِتگ اَنت

بلوچستان ءِ جتاجتائیں دمگاں بیتگیں اُرشانی زمہ واری بی ایل اے ءُ بی ایل ایف ءَ منّ اِتگ اَنت-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گوشتگ کہ مئے سرمچاراں کلات ءِ دمگ گراپ ءَ زورگریں پاکستانی پوج ءِ پیادگ کارندہ ھما وھد ءَ یک ریموٹ کنٹرول آئی ای ڈی اُرش ءَ نشانگ کتگ اَنت وھدے آ وتی پوسٹانی واستا راشن سر کنگ ءِ جُھد ءَ بیتگ اَنت- تراک ءِ آسر ءَ زورگریں پوج ءِ دو کارمند جاہ پہ جاھی مرتگ ءُ یکے ٹپپگ بیتگ-

جارکش ءَ گوشتگ کہ گوستگیں روچ ءَ بلوچ لبریشن آرمی ءِ سرمچاراں کیچ ءِ دمگ گورکوپ ءِ میان کلگ ءِ ھند سر ءَ زورگریں پاکستانی پوج ءِ کاروان واستا کلئرینس ءَ دلگوش بمن ڈسپوزل یونٹ ءِ پیادگ کارندہ ریموٹ کنٹرول آئی ای ڈی اُرش ءَ نشانگ کتگ اَنت چریشی ءِ آسر ءَ زورگریں پوج ءِ یک کارمندے یے جاہ پہ جاھی مرتگ ءُ یکے سک ٹپیگ بیتگ-

ھمے وڑ بلوچستان لبریشن فرنٹ ءِ جارکش میجر گْوھرام بلوچ رسانکدر ءَ شنگ کتگیں درشان ءِ تہ ءَ گوشتگ کہ مئے سرمچاراں بیست پنچ اکتوبر ءِ بیگاہ شش ءَ، کیچ ءِ دمگ ککن، تربت ءَ زورگریں پاکستانی پوج ءِ یک چوکی یے سر ءَ راکٹ لانچر ءُ مزنیں سلاھاں چہ اُرش کتگ، چریشی ءَ زورگریں پوج ءَ جانی ءُ مالی تاوان چست کنگ کپتگ-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں بیست پنچ اکتوبر ءِ شپ ءَ تربت سنگانی سر ءَ گل ءِ انٹیلی جنس ونگ ءِ رپورٹ سر ءَ کاروائی کنان ملٹری انٹیلی جنس ءِ چیردستی ءَ کارکنوکیں ڈیتھ اسکواڈ ءِ کارمند اکرم مراد زامرانی ءُ آئی ءِ سنگت شئے مرید سر ءَ تیرگواری کتگ، چریشی ءَ آ دوئیں جاہ پہ جاھی بیران بیتگ اَنت-

جارکش ءَ گْوشتگ کہ شے مرید پیسر ءَ سمیر سبزل ٹولی ءِ باسک بیتگ – اے ٹولی ملٹری انٹیلی جنس ءِ سروکی ءَ کیچ ءِ جتاجتائیں دمگاں بلوچ ورنایانی شھیدی، آوار جنگ، ُدُزی، ڈُنگی ءُ منشیات فروشی وڑیں سلکاریاں ھوار بیتگ- اے ٹولی ءِ کارندھاں 2020 ءَ تربت ءِ دمگ ڈنک ءَ بلوچ شیر زال ملک ناز شھید کتگ-

جارکش ءَ گوشتگ کہ انّیگ ءَ تمپ ءِ دمگ نزر آباد ءَ بلوچ زالبولانی روانک سر ءَ تیرگواری، بازیں ورنایانی شھیدی ءُ زورانسری آوار جنی ءَ ھم اکرم مراد ءُ شے مرید تچکی ءَ ھوار بیتگ اَنت- اشانی اے جُرمانی پُشدر دوئیں گل ءِ سرمچاراں گوستگیں شپ ءَ نشانگ کتگ ءُ کُشتگ اَنت ءُ آیاں چہ سرکاری سلاہ ھم دستیگ کتگ اَنت-

گُڈی ءَ دوئیں گلاں اُرشانی زمہ واری منّ اِتگ ءُ گوشتگ کہ داں بلوچستان ءِ وتواجھی ءَ تاں مئے اے وڑیں اُرشانی زمہ واریاں منّ اِیت-